Iordaniya Qirolligi strategik islom tadqiqotlar markazi tomonidan jahonning eng nufuzli musulmonlarining yangi 500 talik ro‘yxati e’lon qilindi. 2016-yilgi reytingdan O‘zbekiston musulmonlari idorasi rahbari, muftiy Usmonxon Alimov ham o‘rin olgan, deb xabar bermoqda “Qadriyat.uz”.
Reytingda Al-Azhar shayxi Ahmad Toyyib yetakchilik qildi. Ikkinchi pog‘onani Iordaniya qiroli Abdulloh ibn al-Husayn band etdi. Uchinchi o‘rin Saudiya Arabistoni qiroli Salmon bin Abdul-Aziz al-Saudga nasib etdi.
Ro‘yxatga, shuningdek, Turkiya prezidenti Rajab Toyyib Erdo‘g‘on, Afg‘oniston prezidenti Ashraf G‘ani, Turkmaniston prezidenti Gurbanguli Berdimuhammedov, Checheniston prezidenti Ramzan Qodirov, Ozarbayjon muftiysi Ollohshukur Poshshozoda, Rossiya muftiysi Ravil G‘aynuddin, Tojikiston muftiysi Sayyidmukarram Abdulqodirzoda ham kiritildi.
Nashrning 2016-yilning eng muhim voqealari ro‘yxatida O‘zbekiston Respublikasining Birinchi Prezidenti Islom Karimovning vafot sanasi kiritilgan. Shuningdek, Rio–2016 yozgi Olimpiya o‘yinlarining musulmon sovrindorlari qatorida 13 nafar o‘zbekistonlik sportchi o‘rin olgan.
Jahonning eng e’tiborli musulmonlarining 500 talik ro‘yxati 2009-yildan beri Iordaniya Qirollik strategik islom tadqiqotlar markazi tomonidan tuzib kelinadi. Muftiy Usmonxon Alimov 2009-yildan beri reytingdan muntazam o‘rin olib keladi.
Usmonxon Alimov 1950-yil 1-yanvarda, Samarqand viloyatida tavallud topgan. 1982–83-yillarda Buxorodagi “Mir Arab” madrasasida, 1983–87-yillarda Toshkent Islom institutida, 1989–90-yillarda Marokashdagi “Karavayin” universitetida tahsil olgan. 1987–2000-yillar davomida Payariq tumanidagi “Imom Buxoriy” masjidida imom-xatib, 2000–2006-yillarda O‘zbekiston musulmonlari idorasining Samarqanddagi bosh vakili vazifasida faoliyat olib borgan. 2006-yil 8-avgust kuni Usmonxon Alimov O‘zbekiston musulmonlari idorasi raisi, muftiy lavozimiga tayinlangan.
Ma’lumot uchun, Muftiy Usmonxon Alimovdan tashqari, jahonning eng e’tiborli musulmonlarining 500 talik reytingidan O‘zbekistondan 2009-yilgi ilk reytingda Shayx Muhammad Sodiq Muhammad Yusuf, 2013-yili esa O‘zbekiston Prezidenti Islom Karimov joy olgan.
Izoh (0)