Иордания Қироллиги стратегик ислом тадқиқотлар маркази томонидан жаҳоннинг энг нуфузли мусулмонларининг янги 500 талик рўйхати эълон қилинди. 2016 йилги рейтингдан Ўзбекистон мусулмонлари идораси раҳбари, муфтий Усмонхон Алимов ҳам ўрин олган, деб хабар бермоқда «Qadriyat.uz».
Рейтингда Ал-Азҳар шайхи Аҳмад Тоййиб етакчилик қилди. Иккинчи поғонани Иордания қироли Абдуллоҳ ибн ал-Ҳусайн банд этди. Учинчи ўрин Саудия Арабистони қироли Салмон бин Абдул-Азиз ал-Саудга насиб этди.
Рўйхатга, шунингдек, Туркия президенти Ражаб Тоййиб Эрдўғон, Афғонистон президенти Ашраф Ғани, Туркманистон президенти Гурбангули Бердимуҳаммедов, Чеченистон президенти Рамзан Қодиров, Озарбайжон муфтийси Оллоҳшукур Пошшозода, Россия муфтийси Равил Ғайнуддин, Тожикистон муфтийси Саййидмукаррам Абдулқодирзода ҳам киритилди.
Нашрнинг 2016 йилнинг энг муҳим воқеалари рўйхатида Ўзбекистон Республикасининг Биринчи Президенти Ислом Каримовнинг вафот санаси киритилган. Шунингдек, Рио–2016 ёзги Олимпия ўйинларининг мусулмон совриндорлари қаторида 13 нафар ўзбекистонлик спортчи ўрин олган.
Жаҳоннинг энг эътиборли мусулмонларининг 500 талик рўйхати 2009 йилдан бери Иордания Қироллик стратегик ислом тадқиқотлар маркази томонидан тузиб келинади. Муфтий Усмонхон Алимов 2009 йилдан бери рейтингдан мунтазам ўрин олиб келади.
Усмонхон Алимов 1950 йил 1 январда, Самарқанд вилоятида таваллуд топган. 1982–83 йилларда Бухородаги «Мир Араб» мадрасасида, 1983–87 йилларда Тошкент Ислом институтида, 1989–90 йилларда Марокашдаги «Каравайин» университетида таҳсил олган. 1987–2000 йиллар давомида Паяриқ туманидаги «Имом Бухорий» масжидида имом-хатиб, 2000–2006 йилларда Ўзбекистон мусулмонлари идорасининг Самарқанддаги бош вакили вазифасида фаолият олиб борган. 2006 йил 8 август куни Усмонхон Алимов Ўзбекистон мусулмонлари идораси раиси, муфтий лавозимига тайинланган.
Маълумот учун, Муфтий Усмонхон Алимовдан ташқари, жаҳоннинг энг эътиборли мусулмонларининг 500 талик рейтингидан Ўзбекистондан 2009 йилги илк рейтингда Шайх Муҳаммад Содиқ Муҳаммад Юсуф, 2013 йили эса Ўзбекистон Президенти Ислом Каримов жой олган.
Изоҳ (0)