“Agrobank” aksiyadorlik tijorat banki tomonidan Agrobank Mobile zamonaviy innovatsion xizmat turi joriy qilindi.
Bundan ko‘zlangan asosiy maqsad kundan-kunga chiroy ochib borayotgan shaharu qishloqlarimizda savdo hamda pullik xizmat ko‘rsatish shoxobchalarining aholiga sifatli, tezkor va ishonchli xizmat ko‘rsatish tizimini yanada yaxshilashdan iboratdir. Yangi xizmat turi bank plastik kartalardan foydalanuvchi barcha mijozlarga taklif etilmoqda.
Ushbu xizmat orqali kredit foizlari so‘ndirilishi hamda yer va mol-mulk soliqlariga, uyali aloqa to‘lovlari, shahar telefonlariga to‘lovlar hamda internet, internet-saytlar uchun mobil telefonga to‘lovlarni amalga oshirishingiz mumkin. Buning uchun Google Play mobil dasturlar do‘konidan Agrobank Mobile mobil dasturini yuklab olishingiz lozim.
Shundan so‘ng mobil telefoningiz orqali barcha to‘lovlarni amalga oshirishingiz mumkin bo‘ladi.
Bundan tashqari, ushbu xizmat turi orqali mijozlar (jismoniy shaxslar) bir plastik kartadan boshqa plastik kartaga pul o‘tkazish, plastik karta hisob raqamidagi qoldiq mablag‘larni ko‘rish, ushbu qoldiq mablag‘lar hisobidan kreditning asosiy qarzi va hisoblangan foizini so‘ndirish va boshqa maqsadlarda mablag‘lar o‘tkazish imkoniyatiga ega bo‘ladilar.
Shuningdek, yuridik shaxslar va yakka tartibdagi tadbirkorlar Agrobank Mobile — Biznes xizmat turi orqali bank hisob raqamidagi mablag‘larni tasarruf etish (boshqarish) imkoniyatiga ega bo‘ladilar.
Yuridik shaxslar va yakka tartibdagi tadbirkorlar Agrobank Mobile mavjud limit va qoidalarga rioya qilgan xolda xizmatlar uchun to‘lovlarni o‘tkazish, doimiy to‘lovlar shablonini hosil qilish, vaqt va transport xarajatlarini tejagan holda bankka to‘lov hujjatlarini yuborish, real vaqt mobaynida bu hujjatlarning qayta ishlanishini kuzatib borish, xatoliklar to‘g‘risida tezkor ma’lumotlar olish, istalgan muddat uchun hisob raqamlardan ko‘chirmalar olish, turli hisobotlarni shakllantirish va o‘z to‘lovlarini elektron imzo yordamida tasdiqlash imkoniga ega bo‘ldilar.
Markaziy apparatning informatsion texnologiyalar departamenti tomonidan biriktirilgan administrator Agrobank Mobile xizmatini doimiy ishlashini nazorat qiladi hamda tizimga filialdagi tegishli xodimlar foydalanuvchi sifatida kirishi uchun maxsus login, parol ochilishini ta’minlaydi.
Agrobank Mobile ilovasiga taalluqli qo‘shimcha ma’lumotlarni “Agrobank”ning rasmiy sayti orqali ham olish mumkin.
Izoh (0)