Belgiyalik dasturchi va ZeroMQ erkin loyihasining asoschisi Piter Xinjens Twitter’dagi sahifasida ixtiyoriy evtanaziyani tanlaganligini ma’lum qildi, deb yozadi TJournal.
Aprel oyida Piterga o‘pka saratoni tashxisi qo‘yilgan edi.
Piter Xinjens dasturlar o‘rtasida xabarlar almashishni ta’minlash dasturi — ZeroMQ loyihasiga asos solgan. Bundan avval u Erkin axborot infratuzilmasi jamg‘armasi prezidenti lavozimini egallagan. Dasturlash bo‘yicha bir qator kitoblar muallifidir.
Unda aniqlangan xavfli o‘sma tezda butun organizm bo‘ylab tarqaldi. Saratonning ushbu turiga kimyo terapiyasi deyarli ta’sir qilmasligi vaziyatni yanada yomonlashtirdi.
Tashxisdan so‘ng Piter barchaga xastaligi haqida so‘zlab berdi va ijtimoiy tarmoqda “Hayotni tark etish bayonnomasi” qaydini chop etdi. Unda tuzatib bo‘lmas xastalikka chalingan kishi yon-atrofdagilar bilan qanday yo‘l tutishi lozimligi haqidagi tavsiyalar bilan bo‘lishdi.
4-oktabr kuni Piter Xinjens soat birga rejalashtirilgan evtanaziya jarayonini o‘tkazishni iltimos qildi. Uning Twitter akkauntidagi oxirgi xabari Belgiya vaqti bilan 13:35 da chop etildi.
Izoh (0)