AQSHning Arizona shtatida yashovchi fuqaro o‘pka vabosidan (pnevmonik vabo) vafot etdi. Bu haqda BBC xabar berdi.
So‘nggi marotaba vabodan o‘lim holati shtatda 2007-yilda qayd etilgandi. O‘shanda odam kasallik yuqtirgan o‘lik hayvon bilan kontaktda bo‘lgan.
“Qora ajal” nomi bilan mashhur bo‘lgan vabo XIV asrda Yevropa aholisining yarmini qirib tashlagan. Bugungi kunda bu kasallik juda kam uchraydi va uni antibiotiklar bilan davolasa bo‘ladi.
Sog‘liqni saqlash idoralariga ko‘ra, AQSHda har yili o‘rtacha 7 nafar odamda o‘lat (vabo) kasalligi qayd etiladi. Hozirgi holatning tarqalish xavfi past ekanligi aytilgan.
Pnevmonik vabo — yersinia pestis bakteriyasi keltirib chiqaradigan og‘ir o‘pka infeksiyasi. U boshqa vabo turlari ichida eng jiddiy va xavflisi sanaladi. Umuman olganda, o‘latning turli shakllari mavjud. Ularning orasida bubonli o‘lat eng keng tarqalgan tur bo‘lib, infeksiyalangan burga chaqishi natijasida yuzaga keladi.
Bubonli o‘latning belgilari odatda yuqtirilgandan keyin 2-8 kun ichida paydo bo‘ladi. Uning simptomlariga isitma, titroq, bosh og‘rig‘i, holsizlik va limfa tugunlarining shishishi kiradi.
Izoh (0)