Turkiyaning yangi konstitutsiyasi yaqin orada qabul qilinishi lozim. Bu haqda mamlakat prezidenti Rajab Toyyib Erdo‘g‘on ma’lum qildi, deya xabar beradi “TASS”.
“Qisqa muddatlarda yangi konstitutsiya qabul qilishimiz zarur. Eng kamida asosiy qonunga keng ko‘lamdagi tuzatishlar kiritishimiz talab etiladi. Prezident sifatida millat xohish-istagidan kelib chiqib barcha muammolar hal etilishini ko‘zda tutuvchi konstitutsiyani tayyorlash bo‘yicha ishlarni qo‘llab-quvvatlayman”, — deya ta’kidladi prezident parlament sessiyasi ochilishidagi chiqishi chog‘ida.
Erdo‘g‘on 1980-yilda ro‘y bergan to‘ntarishdan ikki yil o‘tib qabul qilingan Asosiy qonun o‘rniga yangi, boshqaruvning prezidentlik shaklini mustahkamlovchi konstitutsiyani qabul qilish kerakligi haqida avval ham bir necha bor gapirgandi.
Asosiy qonun loyihasi ustidagi ishlar hukmron Adolat va taraqqiyot partiyasi tashabbusi bilan mamlakatda iyulda sodir etilgan to‘ntarishga urinishdan so‘ng qaytadan boshlandi.
Izoh (0)