Eron harbiy-dengiz kuchlari NATO a’zosi bo‘lgan davlat kemasi bilan ilk bor qo‘shma mashg‘ulotlar o‘tkazdi

Fors ko‘rfazi va Ormuz bo‘g‘ozi akvatoriyasida Eron va Italiya harbiy-dengiz mashg‘ulotlari bo‘lib o‘tdi. Bu haqda Eron harbiy-dengiz kuchlarining birinchi harbiy-dengiz hududi qo‘mondoni, admiral Husayn Ozod ma’lum qildi, deya xabar bermoqda “TASS”.

Mashg‘ulotlarda Eron tomonidan “Alvand” va “Albors” esminetslari, Italiyadan “Euro” fregati, ikki tarafdan ham bittadan vertolyot ishtirok etgan.

“Italiya bilan birgalikdagi mashqlar jangovar tayyorgarlikni oshirish, shuningdek, tajriba va jangovar malaka almashish maqsadida o‘tkazildi”, — deya ta’kidladi admiral. 

Mintaqadagi dengiz qaroqchiligiga qarshi kurash missiyasi doirasida bo‘lib turgan “Euro” fregati 24-sentabr kuni do‘stona tashrif bilan Bandar-Abbos portiga kirdi.

Xabar berishlaricha, 15 yildan beri birinchi bor Italiya harbiy-dengiz kuchlari kemasi Eron portiga kelgan.