Merkel, Olland va Yunker Yevropa sanoatchilari bilan raqobatbardoshlikni oshirish hamda innovatsiyalarni muhokama qiladi

Yevroittifoqqa a’zo davlatlar Buyuk Britaniya ittifoqdan chiqqanidan so‘ng hamjamiyatni yanada rivojlantirish va iqtisodiy o‘sishni ta’minlash bo‘yicha ishlarni davom ettirish niyatida. Bu haqda Germaniya kansleri Angela Merkel Berlin uchrashuvi arafasidagi matbuot anjumanida ma’lum qildi, deya xabar beradi “TASS”.

“Biz bugun Buyuk Britaniyadagi referendumdan so‘ng yana bir bor Yevroittifoqdagi vaziyatni muhokama etamiz. Bratislavadagi uchrashuvdan so‘ng tuzilmaga a’zo 27 davlat iqtisodiy rivojlanishdan fuqarolarimiz farovonligi va yangi ish o‘rinlarini yaratishda foydalanishga qaror qilganmiz. Bu borada ulkan rejalarimiz bor”, — deya ta’kidladi Merkel.

Berlin uchrashuvida Fransiya prezidenti Fransua Olland, Yevrokomissiya raisi Jan-Klod Yunker, qit’adagi yirik konsernlarning European Round Table of Industrialists (“Yevropa sanoatchilari davra stoli”) klubiga a’zo 20 nafar rahbari ishtirok etadi.

Ular Yevropa iqtisodiyoti raqobatbardoshligini oshirish, innovatsiyalar hamda raqamli texnologiyalarni joriy etish masalalarini muhokama etishi kutilmoqda.