“Peyn” sikloni Meksika qirg‘oqlari yaqinida dovulga aylandi

Meksikaning Tinch okeani sohillarida “Peyn” sikloni Saffir—Simpson shkalasi bo‘yicha birinchi toifadagi dovul kuchini yig‘di. Bu haqda 19-sentabr, dushanba kuni Meksika milliy meteorologiya xizmati ma’lum qildi, deya xabar beradi “TASS”.

“Peyn” sikloni Meksikaning Quyi Janubiy Kaliforniya shtati qirg‘oqlaridan 450 kilometr uzoqda bo‘lib, shimoli-g‘arbiy yo‘nalish bo‘ylab soniyasiga 6,7 metr tezlikda harakat qilmoqda.

Dovul shtatning bir qator tumanlarida o‘ta kuchli yog‘ingarchilikka, Mexiko, Morelos, Puebla shtatlari va mamlakat poytaxtida esa 50 dan 75 millimetrgacha yog‘in tushishiga sabab bo‘lishi kutilmoqda.

Rasmiylar aholini ehtiyot choralarini ko‘rish, joylardagi fuqaro muhofazasi tizimlari ogohlantiruvlarini kuzatib borishga chaqirdi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.