Amerikaning Associated Press agentligi va boshqa bir nechta OAVlari San-Bernardino (Kaliforniya shtati)da 14 kishini o‘ldirgan “mergan” Said Faruqning iPhone smartfonini buzib kirish haqidagi ish bo‘yicha Federal qidiruv byurosini sudga berdi, deb yozadi “TASS”.
“Jamoatchilik uchun FQB smartfonni buzib ochish uchun zarur uskunani qo‘lga kiritishga shuncha pul sarflaganini tushunish, shuningdek, ushbu uskunani taqdim etgan kishining shaxsini bilish o‘ta muhim”, — deyiladi Kolumbiya okrugi bo‘yicha AQSh federal okrug sudiga berilgan da’vo arizasida.
Associated Press Faruqning smartfoniga buzib kirish uchun AQSh hukumati kimga va qancha to‘laganini bilishni istaydi. Agentlikning da’vosiga Amerikaning USA Today gazetasini nashr etuvchi Gannett nashriyoti, shuningdek, Vice Media media-kompaniyasi qo‘shildi.
Eslatib o‘tamiz, 2015-yilning 2-dekabr kuni AQSh fuqarosi Said Faruq turmush o‘rtog‘i Teshfin Malik bilan San-Bernardinodagi nogironlarga yordam ko‘rsatish markaziga uyushtirgan hujumi oqibatida 14 kishi halok bo‘lgan, 21 kishi jarohat olgan edi. Politsiya tomonidan yo‘q qilingan terrorchilar IShIDga daxldorligi aytilgan edi.
16-fevral kuni AQSh sudi Apple korporatsiyasi Federal qidiruv byurosi xodimlariga “San-Bernardino mergani”ning telefonini buzib, undagi ma’lumotlarni olishda yordam berishi lozimligi haqida qaror qabul qildi. Korporatsiya rahbari Tim Kuk bunga javoban sud qaroriga rasmiy e’tiroz bildirilishini ta’kidlagan.
Keyinroq hukumat mutaxassislari boshqacha usul bilan, ma’lumotlarni o‘chirmasdan turib qurilmaga kirishga muvaffaq bo‘lgani, shu tufayli hukumat Apple yordamiga “endi muhtoj emas”ligi xabar berilgan edi.
Izoh (0)