Американинг Associated Press агентлиги ва бошқа бир нечта ОАВлари Сан-Бернардино (Калифорния штати)да 14 кишини ўлдирган «мерган» Саид Фаруқнинг iPhone смартфонини бузиб кириш ҳақидаги иш бўйича Федерал қидирув бюросини судга берди, деб ёзади «ТАСС».
«Жамоатчилик учун ФҚБ смартфонни бузиб очиш учун зарур ускунани қўлга киритишга шунча пул сарфлаганини тушуниш, шунингдек, ушбу ускунани тақдим этган кишининг шахсини билиш ўта муҳим», — дейилади Колумбия округи бўйича АҚШ федерал округ судига берилган даъво аризасида.
Associated Press Фаруқнинг смартфонига бузиб кириш учун АҚШ ҳукумати кимга ва қанча тўлаганини билишни истайди. Агентликнинг даъвосига Американинг USA Today газетасини нашр этувчи Gannett нашриёти, шунингдек, Vice Media медиа-компанияси қўшилди.
Эслатиб ўтамиз, 2015 йилнинг 2 декабрь куни АҚШ фуқароси Саид Фаруқ турмуш ўртоғи Тешфин Малик билан Сан-Бернардинодаги ногиронларга ёрдам кўрсатиш марказига уюштирган ҳужуми оқибатида 14 киши ҳалок бўлган, 21 киши жароҳат олган эди. Полиция томонидан йўқ қилинган террорчилар ИШИДга дахлдорлиги айтилган эди.
16 февраль куни АҚШ суди Apple корпорацияси Федерал қидирув бюроси ходимларига «Сан-Бернардино мергани»нинг телефонини бузиб, ундаги маълумотларни олишда ёрдам бериши лозимлиги ҳақида қарор қабул қилди. Корпорация раҳбари Тим Кук бунга жавобан суд қарорига расмий эътироз билдирилишини таъкидлаган.
Кейинроқ ҳукумат мутахассислари бошқача усул билан, маълумотларни ўчирмасдан туриб қурилмага киришга муваффақ бўлгани, шу туфайли ҳукумат Apple ёрдамига «энди муҳтож эмас»лиги хабар берилган эди.
Изоҳ (0)