“Kommersant” Nashriyot uyining veb-saytida “Mening do‘stim Islom Karimov” nomli maqola chop etildi, deya xabar bermoqda “Jahon” axborot agentligi. Unda Yaponiyaning O‘zbekistondagi sobiq elchisi Akio Kavato O‘zbekiston Birinchi Prezidentining faoliyati hamda uning O‘zbekiston va Yaponiya o‘rtasidagi ikki tomonlama aloqalarni rivojlantirishga qo‘shgan hissasi haqida hikoya qiladi.
Maqolada ta’kidlanishicha, 25 yil davom etgan prezidentlik mobaynida Islom Karimov ko‘p narsa qilishga ulgurdi. Bu, avvalambor, “davlat tizimini yo‘lga qo‘yish, paxta eksportiga o‘ta bog‘liqlikni yengib o‘tgan holda, mustaqil iqtisodiyotni tashkil etish. U mustaqil tashqi siyosatni ham ishlab chiqa oldi… Prezident o‘tgan yillar ichida davlat qurilishining muhim bosqichi — shakllanishni yakuniga yetkazishga ulgurdi”.
A.Kavato O‘zbekistonning zamonaviy taraqqiyotiga batafsil to‘xtalib o‘tdi. “Bugun, O‘zbekistonga uchib kelganingda, balandlikdan qarab dalalarning batartibligi va Farg‘ona vodiysining yaxshi parvarish qilinganini ko‘rib, hayratga tushasan, yerga tushgandan keyin zavod va fabrikalarga tashrif buyurganingda esa o‘zbek menejerlari o‘z ishini tushunishini ko‘rib, yaxshi taassurotlar olasan”.
Shu mavzuni davom ettirib, Kavato shunday deydi: “Mening mamlakatim bunga aloqador ekanligini anglash menga quvonch bag‘ishlaydi. Yaponiya O‘zbekiston va boshqa Markaziy Osiyo mamlakatlariga sezilarli iqtisodiy hamkorlik ko‘rsatdi — Yaponiya grantlari va investitsiyalarining jami qiymati qariyb 5 milliard dollarga teng”.
Xulosa sifatida A.Kavato Islom Karimov tomonidan o‘rnatilgan, davlatning mustaqilligi va odamlarning farovonligiga qaratilgan umumiy yo‘nalish bundan keyin ham davom etishiga ishonch bildirdi.
Izoh (0)