O‘zbekiston Respublikasi Oliy Majlisi huzuridagi jamoat fondi mablag‘larini boshqarish bo‘yicha parlament komissiyasining navbatdagi yig‘ilishi bo‘lib o‘tdi. Unda nodavlat-notijorat tashkilotlari, ommaviy axborot vositalari va fuqarolik jamiyati boshqa institutlarining loyiha hamda dasturlarini davlat tomonidan moliyaviy qo‘llab-quvvatlash masalalari muhokama qilindi. Bu haqda O‘zA xabar bermoqda.
Joriy yilda Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi tomonidan davlat ijtimoiy buyurtmasi taqdim etish va davlat grantlari ajratish bo‘yicha oltita tanlov o‘tkazildi. Ushbu tanlovlarda mingga yaqin NNT, OAV va fuqarolik jamiyatining boshqa institutlari ishtirok etib, 27 milliard 760 million so‘mlik loyihalar taqdim etdi.
Tanlovlar natijasida muhim ijtimoiy ahamiyatga molik 210 dan ziyod loyiha qo‘llab-quvvatlandi. Ularga davlat budjeti mablag‘lari hisobidan 5 milliard 230 million so‘m ajratildi. Shuningdek, davlat ijtimoiy buyurtmalari shaklida 2,3 milliard so‘mlik loyihalar bajarilmoqda.
Yig‘ilishda joriy yilning 20-sentabridan 20-oktabrigacha bo‘lgan muddatda “NNT, OAV va fuqarolik jamiyati institutlarining mamlakatda kuchli fuqarolik jamiyatini barqaror rivojlantirishni ta’minlashga va ijtimoiy sheriklikni yanada rag‘batlantirishga qaratilgan loyihalarini qo‘llab-quvvatlash” mavzuida qo‘shimcha tanlov o‘tkazish tasdiqlandi.
Tadbirda NNT, OAV va fuqarolik jamiyati boshqa institutlariga davlat ijtimoiy buyurtmasi berish yuzasidan yosh avlodni sog‘lom, barkamol qilib tarbiyalash, intellektual va ijodiy salohiyatini ro‘yobga chiqarishga yo‘naltirilgan qo‘shimcha tanlovni tashkil etish bo‘yicha qaror qabul qilindi. Bu loyihalarga 1,5 milliard so‘m yo‘naltiriladi.
Izoh (0)