Ўзбекистон Республикаси Олий Мажлиси ҳузуридаги жамоат фонди маблағларини бошқариш бўйича парламент комиссиясининг навбатдаги йиғилиши бўлиб ўтди. Унда нодавлат-нотижорат ташкилотлари, оммавий ахборот воситалари ва фуқаролик жамияти бошқа институтларининг лойиҳа ҳамда дастурларини давлат томонидан молиявий қўллаб-қувватлаш масалалари муҳокама қилинди. Бу ҳақда ЎзА хабар бермоқда.
Жорий йилда Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан давлат ижтимоий буюртмаси тақдим этиш ва давлат грантлари ажратиш бўйича олтита танлов ўтказилди. Ушбу танловларда мингга яқин ННТ, ОАВ ва фуқаролик жамиятининг бошқа институтлари иштирок этиб, 27 миллиард 760 миллион сўмлик лойиҳалар тақдим этди.
Танловлар натижасида муҳим ижтимоий аҳамиятга молик 210 дан зиёд лойиҳа қўллаб-қувватланди. Уларга давлат бюджети маблағлари ҳисобидан 5 миллиард 230 миллион сўм ажратилди. Шунингдек, давлат ижтимоий буюртмалари шаклида 2,3 миллиард сўмлик лойиҳалар бажарилмоқда.
Йиғилишда жорий йилнинг 20 сентябридан 20 октябригача бўлган муддатда «ННТ, ОАВ ва фуқаролик жамияти институтларининг мамлакатда кучли фуқаролик жамиятини барқарор ривожлантиришни таъминлашга ва ижтимоий шерикликни янада рағбатлантиришга қаратилган лойиҳаларини қўллаб-қувватлаш» мавзуида қўшимча танлов ўтказиш тасдиқланди.
Тадбирда ННТ, ОАВ ва фуқаролик жамияти бошқа институтларига давлат ижтимоий буюртмаси бериш юзасидан ёш авлодни соғлом, баркамол қилиб тарбиялаш, интеллектуал ва ижодий салоҳиятини рўёбга чиқаришга йўналтирилган қўшимча танловни ташкил этиш бўйича қарор қабул қилинди. Бу лойиҳаларга 1,5 миллиард сўм йўналтирилади.
Изоҳ (0)