O‘zbekiston Respublikasi Vazirlar Mahkamasining shu yil 31-avgustdagi qarori bilan fuqarolik va davlat aviatsiyasida uchuvchisiz uchish qurilmalardan foydalanish tartibi tasdiqlandi. Bu haqda “Gazeta.uz” xabar bermoqda.
Yangi hujjatda o‘yinchoqlar, aviamodellar va uchuvchisiz uchish qurilmalari o‘rtasidagi farqlar keltirib o‘tilgan. Fuqarolarning shaxsiy foydalanishi uchun vazni 250 gramdan ortiq bo‘lmagan, TN VED 8802 20 000 0 kodiga mos tushmaydigan, avtonom boshqarish va navigatsiya funksiyalarisiz, foto va video uskunalar bilan ta’minlanmagan uchish uskunalari o‘yinchoq havo kemalari sifatida tasniflanadi.
Havo kengliklarida o‘yinchoq modellardan foydalanish uchun ruxsatnoma olish talab qilinmaydi. 50 metrgacha balandlikda, aerodromlarning uchish yo‘laklaridan 150 metr uzoqlikda, odamlardan xavfsiz masofada uchish uskunasi bilan doimiy vizual aloqa o‘rnatilgan taqdirda o‘yinchoq modellar parvozlarini amalga oshirish mumkin.
Aviamodellarning o‘yinchoqlardan farqli jihati ular vaznining 250 gramdan ortishi hamda o‘quv, sport, madaniy-ma’rifiy tadbirlar, texnik ijodkorlikni rivojlantirishga mo‘ljallanganidadir. Aviamodellar parvozi faqat havo kemalarining maxsus parvoz hududlarida amalga oshiriladi. Havo kemalarining o‘yinchoq modellari yoki aviamodellardan tashqari boshqa barcha shakllari uchuvchisiz uchish qurilmalari sifatida toifalanadi.
Uchuvchisiz uchish qurilmalaridan foydalanishga ruxsat olish uchun dastlab ularga o‘rnatilgan radioelektron vositalardan foydalanish uchun ijozat olish talab qilinadi. Foydalanishga ruxsat berish Parvozlar xavfsizligini nazorat qilish davlat inspeksiyasi tomonidan amalga oshiriladi. Bunda qurilma sanoat miqyosida ishlab chiqarilgan, ishlab chiqaruvchi zavod pasportiga ega bo‘lishi hamda parvoz vazni 25 kilogramgachani tashkil etishi lozim. Murojaatlar 10 ish kuni ichida ko‘rib chiqiladi.
Xorijiy davlatlar uchuvchisiz uchish qurilmalarining O‘zbekiston havo kengliklarida parvoz qilishiga faqatgina Vazirlar Mahkamasi ruxsati bilan yo‘l qo‘yiladi.
Ma’lumot uchun, 2015-yil 1-yanvardan O‘zbekistonga uchuvchisiz uchar qurilmalarni olib kirish, sotish va foydalanishga to‘liq taqiq qo‘yilgandi. 2016-yil mayidan boshlab esa hukumat o‘zining alohida qarorlari bilan uchuvchisiz uchar qurilmalarni import qilish, sotish va parvozlariga ruxsat berish imkoniyatlarini ko‘rib chiqishi ma’lum qilindi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)