Ўзбекистонда учувчисиз учиш қурилмалари рўйхатдан ўтказилиши маълум қилинди

Ўзбекистон Республикаси Вазирлар Маҳкамасининг шу йил 31 августдаги қарори билан фуқаролик ва давлат авиациясида учувчисиз учиш қурилмалардан фойдаланиш тартиби тасдиқланди. Бу ҳақда «Газета.uz» хабар бермоқда.

Янги ҳужжатда ўйинчоқлар, авиамоделлар ва учувчисиз учиш қурилмалари ўртасидаги фарқлар келтириб ўтилган. Фуқароларнинг шахсий фойдаланиши учун вазни 250 грамдан ортиқ бўлмаган, ТН ВЭД 8802 20 000 0 кодига мос тушмайдиган, автоном бошқариш ва навигация функцияларисиз, фото ва видео ускуналар билан таъминланмаган учиш ускуналари ўйинчоқ ҳаво кемалари сифатида таснифланади.

Ҳаво кенгликларида ўйинчоқ моделлардан фойдаланиш учун рухсатнома олиш талаб қилинмайди. 50 метргача баландликда, аэродромларнинг учиш йўлакларидан 150 метр узоқликда, одамлардан хавфсиз масофада учиш ускунаси билан доимий визуал алоқа ўрнатилган тақдирда ўйинчоқ моделлар парвозларини амалга ошириш мумкин.

Авиамоделларнинг ўйинчоқлардан фарқли жиҳати улар вазнининг 250 грамдан ортиши ҳамда ўқув, спорт, маданий-маърифий тадбирлар, техник ижодкорликни ривожлантиришга мўлжалланганидадир. Авиамоделлар парвози фақат ҳаво кемаларининг махсус парвоз ҳудудларида амалга оширилади. Ҳаво кемаларининг ўйинчоқ моделлари ёки авиамоделлардан ташқари бошқа барча шакллари учувчисиз учиш қурилмалари сифатида тоифаланади.

Учувчисиз учиш қурилмаларидан фойдаланишга рухсат олиш учун дастлаб уларга ўрнатилган радиоэлектрон воситалардан фойдаланиш учун ижозат олиш талаб қилинади. Фойдаланишга рухсат бериш Парвозлар хавфсизлигини назорат қилиш давлат инспекцияси томонидан амалга оширилади. Бунда қурилма саноат миқёсида ишлаб чиқарилган, ишлаб чиқарувчи завод паспортига эга бўлиши ҳамда парвоз вазни 25 килограмгачани ташкил этиши лозим. Мурожаатлар 10 иш куни ичида кўриб чиқилади.

Хорижий давлатлар учувчисиз учиш қурилмаларининг Ўзбекистон ҳаво кенгликларида парвоз қилишига фақатгина Вазирлар Маҳкамаси рухсати билан йўл қўйилади.

Маълумот учун, 2015 йил 1 январдан Ўзбекистонга учувчисиз учар қурилмаларни олиб кириш, сотиш ва фойдаланишга тўлиқ тақиқ қўйилганди. 2016 йил майидан бошлаб эса ҳукумат ўзининг алоҳида қарорлари билан учувчисиз учар қурилмаларни импорт қилиш, сотиш ва парвозларига рухсат бериш имкониятларини кўриб чиқиши маълум қилинди.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.