Miloddan avvalgi davrni sahnaga olib chiqish, o‘sha davrni bugungi kun nuqtai nazari bilan ko‘rsata olish — oson vazifa emas. Rejissor Sayfiddin Meliyev tomonidan faqat kinoaktyorlar ishtirokida sahnalashtirilgan “To‘maris” spektakli tomoshasida bo‘lgan jurnalist Feruz Muhammadning fikricha, “O‘zbekkino” milliy agentligi qoshida tashkil qilingan Kinoaktyor teatr studiyasi ilk qadamidanoq bu vazifani uddalay oldi, deyish mumkin.
Salkam olti yildan buyon hech qaysi filmda suratga tushmayotgan aktrisa Ilmira Rahimjonova spektaklda bosh qahramon — To‘marisni gavdalantirdi. Bir vaqtlar xor jamoasi tarkibida epizodik bir rolini aytmasa, bu Rahimjonovaning teatrdagi ilk rolidir. Iste’dodli aktrisa katta tanaffusga bir spektakldagi yuqori maromdagi ijrosi bilan chek qo‘ydi. O‘g‘li Sparangiz vafot etgan vaqtdagi ona To‘marisning nidosi, mazkur monologning yuraklarni o‘rtar darajada ijro bilan yetkazib berilgani yuqoridagi e’tirofga isbotdir.
Mahoratli aktrisa Feruza Sobitovaning spektakldagi Mehribedod roli ijrosi uning “Oyqiz ertagi” filmidagi ayyor malika rolidan qolishmaydi. Uning nomi zikr etilgan film va spektaklidagi rollari bir-biriga juda o‘xshash, yagona farq — Mehribedod filmdagi ayyor malikadan ko‘ra jonliroq, tomoshabinda o‘ziga nisbatan haqqoniy nafratni uyg‘ota oladigan darajada.
Spektaklda birgina “Urush boshlandi!” degan gap turfa qahramonlar talqinida olti xil ko‘rinishda yangraydi: Kiryovush va Mehribedod bu kalimani kibr, mensimaslik, yovuzlik bilan tilga oladi, sotqin Frada esa bu gapga vahimali, sarosimaga tushib, ayni vaqtda hiylakorlik bilan va xoinona yondashadi. Uning qizi Rayada boqi beg‘amlik bilan, tantiq qiz sifatida, qo‘shnayzalarning orasida: “Urush boshlandi, urush boshlandi, urush boshlandi!”, deya o‘ynab, sakrab urushga munosabatini bildiradi. To‘marisning o‘g‘li Sparangiz jangchi, yurtni qo‘riqlaydigan posbon siymosida, qo‘lida qurol-yarog‘i bilan jangga shay askar sifatida gavdalansa, malika To‘maris juda ham vazminlashib qoladi — rejissor birgina gap bilan urush olti inson taqdirida qanday o‘rin tutushini, qahramonlarning qanday inson ekanligini ko‘rsatib bera olgan.
Spektakldagi har bir aktyorning ijrosini alohida e’tirof qilishga arziydi — Karim Mirhodiyev shoh Kiryovush rolini, Farhod Xudoyberdiyev sotqin Frada rolini, Nargiza Salmonova Fradaning qizi rolini, Husan Rashidov Sparangiz rolini mohirlik bilan ijro qilib, o‘z zimmasidagi vazifani to‘la ado eta olgan, deyish mumkin.
Kinochilar uyining 170 kishilik pushti zalida jurnalistlar uchun uyushtirilgan dastlabki namoyishda faqat bir e’tiroz bildirildi — spektakl davomida kinoaktyorlar ba’zan shevada so‘zlab ketayotgani, ammo bu spektaklning nishonasi bo‘lgani sabab, takroriy namoyishlardan so‘ng bari iziga tushib ketishin ta’kidlandi. Qariyb bir soat davom etgan spektakldan so‘ng jurnalistlar Kinoaktyor teatr studiyasi ijodkorlariga o‘ziga xos hurmat bildirib, ularni salkam bir daqiqa davomida davomli qarsaklar bilan olqishlab turishdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)