Aktyor Ulug‘bek Yunusov rejissorlikka murojaat qildi. Uning “Josus kampir 007” nomli ilk filmi haqida batafsil ma’lumot olish uchun jurnalist Feruz Muhammad boshlovchi rejissor bilan suhbatlashdi.
— Film haqida, fimning qisqacha mazmuni, g‘oyasi haqida gapirib bersangiz.— Bugungi kun ayollarida ko‘rmagan, bilmagan narsasini gapirib yurish yoki ko‘rganini bo‘rttirib, o‘zidan 5—6 ta qo‘shib gapirish odati bor. Aynan ko‘rmagan narsasini gapirish, o‘zidan qo‘shib gapirish orqali ba’zi oilalarda muammolar kelib chiqadi. Filmda xuddi shu muammolar, kamchiliklarni, bizga yot bo‘lgan illatlarni kulgu yo‘li bilan ko‘rsatib berishga uringanmiz. Har xil janrlardan foydalanib, eksperiment qilgan joylarimiz ham bor. Misol uchun, mashhur kinokomediyalarning eng qiziq usullari, yo‘llarini olishga harakat qildik.
— Filmda “josus kampir” rolini kim ijro qiladi?— Bu rolda O‘zbekiston xalq artisti Shafoat aya Rahmatullayeva namoyon bo‘ladi.
— Aktyorlar jamoasida yana qaysi mashhur nomlarni uchratish mumkin?— Bosh rollarni O‘zbekiston xalq artisti Murod Rajabov, Muhammadiso Abdulxairov, Zarina Nizomitdinova kabilar gavdalantiradi.
— Film qachon katta ekranlarga chiqadi?— Filmni suratga olish ishlari 2016-yilning yanvarida boshlangan edi. Ayni kunlarda film muxlislar e’tiboriga havola qilishga shay holda turibdi. Premyera sentabr oyining o‘rtalariga mo‘ljallangan.
— Bu ilk rejissorlik ishingiz, shundaymi?— Bungacha “Zumrasha” hajviy kinojurnali, hujjatli filmlar, seriallarni suratga olish ishlarida ham qatnashganman. “Josus kampir 007” esa katta kinoda rejissor sifatida xususiy kinostudiyada olgan ilk ishimdir.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)