Милоддан аввалги даврни саҳнага олиб чиқиш, ўша даврни бугунги кун нуқтаи назари билан кўрсата олиш — осон вазифа эмас. Режиссёр Сайфиддин Мелиев томонидан фақат киноактёрлар иштирокида саҳналаштирилган «Тўмарис» спектакли томошасида бўлган журналист Феруз Муҳаммаднинг фикрича, «Ўзбеккино» миллий агентлиги қошида ташкил қилинган Киноактёр театр студияси илк қадамиданоқ бу вазифани уддалай олди, дейиш мумкин.
Салкам олти йилдан буён ҳеч қайси фильмда суратга тушмаётган актриса Илмира Раҳимжонова спектаклда бош қаҳрамон — Тўмарисни гавдалантирди. Бир вақтлар хор жамоаси таркибида эпизодик бир ролини айтмаса, бу Раҳимжонованинг театрдаги илк ролидир. Истеъдодли актриса катта танаффусга бир спектаклдаги юқори маромдаги ижроси билан чек қўйди. Ўғли Спарангиз вафот этган вақтдаги она Тўмариснинг нидоси, мазкур монологнинг юракларни ўртар даражада ижро билан етказиб берилгани юқоридаги эътирофга исботдир.
Маҳоратли актриса Феруза Собитованинг спектаклдаги Меҳрибедод роли ижроси унинг «Ойқиз эртаги» фильмидаги айёр малика ролидан қолишмайди. Унинг номи зикр этилган фильм ва спектаклидаги роллари бир-бирига жуда ўхшаш, ягона фарқ — Меҳрибедод фильмдаги айёр маликадан кўра жонлироқ, томошабинда ўзига нисбатан ҳаққоний нафратни уйғота оладиган даражада.
Спектаклда биргина «Уруш бошланди!» деган гап турфа қаҳрамонлар талқинида олти хил кўринишда янграйди: Кирёвуш ва Меҳрибедод бу калимани кибр, менсимаслик, ёвузлик билан тилга олади, сотқин Фрада эса бу гапга ваҳимали, саросимага тушиб, айни вақтда ҳийлакорлик билан ва хоинона ёндашади. Унинг қизи Раяда боқи беғамлик билан, тантиқ қиз сифатида, қўшнайзаларнинг орасида: «Уруш бошланди, уруш бошланди, уруш бошланди!», дея ўйнаб, сакраб урушга муносабатини билдиради. Тўмариснинг ўғли Спарангиз жангчи, юртни қўриқлайдиган посбон сиймосида, қўлида қурол-яроғи билан жангга шай аскар сифатида гавдаланса, малика Тўмарис жуда ҳам вазминлашиб қолади — режиссёр биргина гап билан уруш олти инсон тақдирида қандай ўрин тутушини, қаҳрамонларнинг қандай инсон эканлигини кўрсатиб бера олган.
Спектаклдаги ҳар бир актёрнинг ижросини алоҳида эътироф қилишга арзийди — Карим Мирҳодиев шоҳ Кирёвуш ролини, Фарҳод Худойбердиев сотқин Фрада ролини, Наргиза Салмонова Фраданинг қизи ролини, Ҳусан Рашидов Спарангиз ролини моҳирлик билан ижро қилиб, ўз зиммасидаги вазифани тўла адо эта олган, дейиш мумкин.
Киночилар уйининг 170 кишилик пушти залида журналистлар учун уюштирилган дастлабки намойишда фақат бир эътироз билдирилди — спектакл давомида киноактёрлар баъзан шевада сўзлаб кетаётгани, аммо бу спектаклнинг нишонаси бўлгани сабаб, такрорий намойишлардан сўнг бари изига тушиб кетишин таъкидланди. Қарийб бир соат давом этган спектаклдан сўнг журналистлар Киноактёр театр студияси ижодкорларига ўзига хос ҳурмат билдириб, уларни салкам бир дақиқа давомида давомли қарсаклар билан олқишлаб туришди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)