Yevropa Ittifoqi Turkiya fuqarolariga 2016-yil oktabriga kelib vizasiz tartibni taqdim etishi kerak, aks holda, Anqara Bryussel bilan muhojirlar bo‘yicha tuzilgan kelishuvdan voz kechadi. Bu haqda Turkiya tashqi ishlar vaziri Mavlud Chavusho‘g‘li Germaniyaning Bild nashriga bergan intervyusida ma’lum qildi, deya xabar beradi Meduza.
“Voqealarning salbiy rivoji haqida gapirishni istamasdim, chunki Yevroittifoq bilan muzokaralar davom etmoqda. Biroq gapning po‘stkallasi shuki, yo barcha kelishuvlar kuchga kiradi yoki biz ularning barchasidan voz kechamiz”, — deya ta’kidladi Chavusho‘g‘li.
Yevroittifoq bilan vizasiz tartib Turkiya o‘zining hududidan ko‘hna qit’aga kirgan qochoqlarni qabul qilishga rozi bo‘lgan kelishuvning asosiy shartlaridan biri. Uni tomonlar 2016-yil may oyida imzoladi. Vizasiz maqom taqdim etilishi uchun Yevroittifoq 72 banddan iborat talablar ro‘yxatini ishlab chiqdi. Rasmiylarga ko‘ra, undagi qator bandlar, birinchi galda aksilterror qonunchilikka oidlari Turkiya tomonidan bajarilmadi.
Izoh (0)