AQShda PricewaterhouseCoopers (PwC) yuridik kompaniyasiga nisbatan uning tarixidagi eng yirik summadan iborat da’vo qo‘zg‘atildi. Bu haqda “RBK” xabar bermoqda.
Da’vo summasi 5,5 milliard dollardan iborat bo‘lib, uni ipoteka krediti bilan shug‘ullangan va hozirda kasodga uchragan Taylor, Bean & Whitaker (TBW) kompaniyasining ishonchli vakili qo‘zg‘adi. Yuridik kompaniya TBW asoschisi Li Farkashning Colonial Bank rahbarlari bilan bir necha milliardlik o‘zaro kelishuvini payqamaganlikda ayblanmoqda. Da’voga ko‘ra, PwC 2002—2008-yillarda bankning bosh kompaniyasi Colonial BancGroup auditini o‘tkazgan va kamchiliklar topmagan. 2009-yilda esa Colonial BancGroup kasodga uchragan. Taylor, Bean & Whitaker ishonchli vakiliga ko‘ra, PwC Colonial Bank’ning 1 milliard dollardan ortiq aktivlari borligini tasdiqlagan, aslida esa buncha mablag‘ bo‘lmagan.
O‘z navbatida, PwC advokatlari kompaniyalari Taylor, Bean & Whitaker bilan hech qachon aloqada bo‘lmaganligi va uning uchun audit o‘tkazmaganligini bildirdi. Ularning ta’kidlashicha, kompaniya kasod bo‘lguncha 7 yil davomida auditini o‘tkazib kelgan Deloitte & Touche ham TBW faoliyatida biron-bir kamchiliklarni aniqlamagan.
Izoh (0)