Hindiston shimolidagi Srinagar shahrida armiya blokpostiga jangarilar hujum qildi, deb yozadi “TASS” NDTV telekanaliga tayanib. Oqibatda kamida to‘rt nafar harbiy xizmatchi yaralandi.
Hujum 15-avgust, dushanba kuni erta tongda sodir etildi, jangarilar harbiylarni o‘qqa tutib, so‘ng yashirindi. Telekanal fikricha, terrorchilar shu tariqa Hindistonda nishonlanayotgan Mustaqillik kuni davlat bayrami tantanalarini buzmoqchi bo‘lgan.
Nashr eslatishicha, avvalroq Srinagar shahri poytaxti hisoblanadigan Jammu va Kashmir shtatida varaqalar tarqatilgan, ularda jangarilar Mustaqillik kunini nishonlamaslikka da’vat etgan edi.
Jammu va Kashmir shtatida bir necha haftalardan buyon keskin vaziyat hukm surmoqda. 8-iyul kuni Hindiston xavfsizlik kuchlari “Hizb-ul-Mujahiddin” ayirmachilar guruhi yetakchilaridan biri Burxon Muzaffar Vaniyni o‘ldirgach, shtatda ommaviy tartibsizliklar boshlandi.
Izoh (0)