Amerikaning Forbes jurnali 10-avgust, chorshanba kuni IT-texnologiyalar sohasidagi 100 nafar eng boy milliarderlar reytingini e’lon qildi, deb yozadi “RBK”.
Forbes bunday reytingni ikkinchi marta tuzmoqda. 2015-yildagi kabi, bu yil ham birinchi o‘rinni Microsoft kompaniyasi asoschilaridan biri Bill Geyts 78 milliard dollarlik davlati bilan egalladi.
Ikkinchi o‘rinda Amazon.com internet-kompaniyasi rahbari va Blue Origin aerokosmik kompaniyasi asoschisi Jeff Bezos joylashdi. Uning boyligi 66 milliard dollarga baholanmoqda. Birinchi uchlikka Facebook asoschisi Mark Sukerberg yakun yasadi (davlati — 54 milliard dollar).
Undan keyingi o‘rinlarni Oracle hamasoschisi Larri Ellison (51,7 milliard dollar), Google asoschilari Larri Peyj va Sergey Brin (39 va 38,2 milliard dollar), Microsoft ta’sischilaridan biri Stiv Balmer (27,7 milliard dollar), Alibaba Group hamasoschisi Jek Ma (25,8 milliard dollar), Tencent rahbari Ma Xuaten (22 milliard dollar) egalladi. Reytingning o‘ninchi pog‘onasida Dell asoschisi Maykl Dell (22 milliard dollar) joylashdi.
Ro‘yxat ishtirokchilarining umumiy boyligi bir yilda 6 foizga ko‘payib, 892 milliard dollarni tashkil etdi. Shu bilan birga, ro‘yxatdagi 27 milliarder bir yil ichida kambag‘allashdi. 2016-yilgi reytingda 12 yangi ishtirokchi paydo bo‘ldi.
Izoh (0)