АҚШнинг Business Insider нашри ўзбекистонлик спортчи Оксана Чусовитина ҳақида мақола чоп этди.
«Олимпиада ўйинлари доим ғаройиб воқеаларга бой бўлиб келган, аммо бу рўйхатнинг энг тепасида гимнастикачи Оксана Чусовитинанинг тарихи турса, ажаб эмас», — деб бошланади мақола.
«Чусовитина ўзбекистонлик 41 ёшли (41!) она бўлиб, Олимпиада ўйинларида еттинчи марта қатнашмоқда. Шунинг ўзиёқ рекорд бўлиб қолмасдан, у шуғулланадиган спорт турини ҳисобга олганда, ҳайратланарли ҳамдир», — дея қайд этилади мақолада.
Таъкидланишича, Чусовитинанинг рақибларидан кўпчилигининг ёши унинг ёшининг ярмига тенг ёки ундан ҳам кичик. АҚШ аёл гимнастикачилари термасининг аъзоси Лори Эрнандез эса, қайд этилишича, Чусовитинанинг 16 ёшли ўғлидан етти ойликка каттароқ, холос.
«Катта савол шундаки, ҳозирда Чусовитина биринчи Олимпиада медалини қўлга киритганидан кейин (1992 йил) туғилган спортчилар фаолият юритаётган спорт тури бўйича юқори даражада мусобақалашишда давом этиш учун у ўзини қандай тайёрлайди?» — дейилади мақолада.
Бунга жавоб сифатида спортчининг ESPNW нашрига берган интервьюсидан парча келтирилади:
«Мен руҳий машқларни кўп бажараман. Танам йиллар давомида мушаклар хотирасини ишлаб чиққан. Мен одатда спорт залида 2—2,5 соат машқ қиламан… сўнг маълум бир машқ айнан қай тарзда бажарилишини тасаввур қиламан. Буни мен калламда бажараман, спорт залига боргач эса, нонуштадан кейинги ёки шунчаки сайр вақтидаги руҳий тайёргарлик спорт залига кўчади. Агар сакрамоқчи бўлсам, мен гавдам айнан нима қилиши кераклигини биламан».
«Умуман олганда, Чусовитина гимнастика билан шунчалик узоқ вақтдан буён шуғулланаётгани туфайли, спорт залига бориб, тўхтовсиз машқ қилишга эҳтиёжи йўқ. Муваффақиятга эришиш учун бажариши керак бўлган ягона нарса — бу ҳақда ўйлаш, холос», — дея хулоса қилди Business Insider.
«22 ёшли Эли Реизмен ўз жамоадошлари томонидан ‘Эли буви’ деб аталадиган спорт тури учун ёмон натижа эмас», — дея мақолага якун ясалди.
Изоҳ (0)