Erdo‘g‘onning vakili: Rossiya bilan munosabatlar NATO bilan muloqotga to‘sqinlik qilmaydi

Turkiyaning Rossiya bilan iliq munosabatlarining tiklanishi uning NATO bilan muloqotni davom ettirishiga to‘sqinlik qilmaydi. Bu haqda, mamlakat prezidenti Rajab Toyyib Erdo‘g‘onning rasmiy vakili Ibrohim Qalinning so‘zlariga asoslanib, “TASS” xabar bermoqda.

“Biz NATOning eng kuchli ittifoqchilaridan biri bo‘lib qolmoqdamiz. Rossiya bilan munosabatlarimiz bunga to‘sqinlik qilmaydi”, — dedi u.

Shuningdek, Turkiyaning alyans bilan Suriya masalasidagi hamkorligi Rossiya bilan muloqotning mustahkamlanishidan zarar ko‘rmasligi ta’kidlandi.

O‘tgan yili keskinlashgan Turkiya-Rossiya munosabatlari oxirgi paytlarda yana iliqlashib bormoqda. Jumladan, 9-avgust kuni Erdo‘g‘on Sankt-Peterburgga tashrif buyurib, Vladimir Putin bilan uchrashdi.