Rossiya turoperatorlari Turkiyaga sayohat narxlari 30 foizgacha pasayishini taxmin qilmoqda

Turkiya yetakchisi Rajab Toyyib Erdo‘g‘on bilan uchrashuvdan so‘ng Rossiya prezidenti Vladimir Putin yaqin orada ikki davlat o‘rtasida charter aviaqatnovi tiklanishini ma’lum qildi. Bu haqda “RBK” xabar bermoqda.

“Bu boradagi asosiy vazifa turk tomoni Rossiya fuqarolari xavfsizligini eng yuqori darajada ta’minlashidir va biz sheriklardan shunday kafolatlarni oldik. Bunga bog‘liq holda charter aviaqatnovi tiklanishini imkoniyatini ham ko‘rib chiqdik. Endi buyog‘i texnik ikir-chikirlar va yaqin muddat masalasi”, — deya ta’kidladi Putin va oldinroq Turkiyaga sayyohlik yo‘llanmalarini sotishga taqiq bekor qilinganini eslatib o‘tdi.

Rossiya turoperatorlari assotsiatsiyasiga ko‘ra, Turkiyaga charter aviaqatnovlariga qo‘yilgan taqiqni bekor qiluvchi hukumat qarori yaqin kunlar ichida qabul qilinishi kutilmoqda. Assotsiatsiya ijrochi direktori Mayya Lomidzening ta’kidlashicha, birinchi charter reyslari 15-avgustdan so‘ng amalga oshirilishi mumkin. Shunday bo‘lgan taqdirda, Turkiyaga sayohat narxlari 25—30 foizga pasayishi mumkin.