Эрдўғоннинг вакили: Россия билан муносабатлар НАТО билан мулоқотга тўсқинлик қилмайди

Туркиянинг Россия билан илиқ муносабатларининг тикланиши унинг НАТО билан мулоқотни давом эттиришига тўсқинлик қилмайди. Бу ҳақда, мамлакат президенти Ражаб Тоййиб Эрдўғоннинг расмий вакили Иброҳим Қалиннинг сўзларига асосланиб, «ТАСС» хабар бермоқда.

«Биз НАТОнинг энг кучли иттифоқчиларидан бири бўлиб қолмоқдамиз. Россия билан муносабатларимиз бунга тўсқинлик қилмайди», — деди у.

Шунингдек, Туркиянинг альянс билан Сурия масаласидаги ҳамкорлиги Россия билан мулоқотнинг мустаҳкамланишидан зарар кўрмаслиги таъкидланди.

Ўтган йили кескинлашган Туркия-Россия муносабатлари охирги пайтларда яна илиқлашиб бормоқда. Жумладан, 9 август куни Эрдўғон Санкт-Петербургга ташриф буюриб, Владимир Путин билан учрашди.