Rossiyaning “MTS” telekommunikatsion operatori 5-avgust, juma kechasi Universal Mobile Systems (UMS) qo‘shma korxonasidagi 50,01 foizga teng ulushini sotgani haqida xabar tarqatdi. Bu haqda “Gazeta.uz” ma’lum qildi.
“Bir qator biznes-sabablarga va boshqa shart-sharoitlarga ko‘ra ‘MTS’ UMS qo‘shma korxonasidagi ulushini sotish qarorini qabul qildi”, — dedi “MTS”ning xorijiy kompaniyalar bo‘yicha vitse-prezidenti Andrey Smelkov.
Xabarnomada aytilishicha, aksiyalar paketi O‘zbekiston axborot texnologiyalari va kommunikatsiyalarni rivojlantirish vazirligining “Radioaloqa, radiouzatish va televideniye markazi” davlat unitar korxonasiga realizatsiya qilindi.
2014-yilning 23-sentabrida “MTS” UMS ustav kapitalining 50,01 foizini beg‘araz asosda qabul qilib olgandi. Aksiyalarning qolgan 49,99 foizi Radioaloqa, radiouzatish va televideniye markaziga tegishli edi.
Kecha, 4-avgust kuni UMS o‘z faoliyatini uzoq muddatli strategiya hamda 2029-yilga qadar mo‘ljallangan uyali aloqa xizmatlarini ko‘rsatish litsenziyasi asosida davom ettirishini ma’lum qilgan edi.
UMS 2014-yilning 1-dekabrida O‘zbekiston hududida mobil aloqa tarmog‘i tijoriy ekspluatatsiyasini yo‘lga qo‘ygan edi. 2016-yil boshidagi holatga ko‘ra kompaniya abonentlari soni 1,095 million foydalanuvchini tashkil etdi.
Izoh (0)