Gollivud aktyori Leonardo Di Kaprio Demokratik partiyadan AQSh prezidentligiga nomzod Hillari Klinton kampaniyasi uchun mablag‘ yig‘ishda ishtirok etadi, deb xabar bermoqda Variety.
Ma’lumotlarga ko‘ra, 23-avgust kuni siyosatchi Los-Anjelesga tashrifi chog‘ida Di Kaprioning hashamatli uyida tashkil etiladigan “Hillari bilan suhbat” nomli tadbirda ishtirok etadi. Tadbirga kirish uchun chipta narxi 33,4 ming dollarni tashkil qiladi. Shulardan 2,7 ming dollari Klintonning saylov fondiga, qolganlari esa Demokratik partiyaning milliy qo‘mitasiga hamda turli partiya aksiyalariga yo‘naltiriladi.
Nashrning qayd etishicha, Di Kaprio Hillari Klintonning tarafdori bo‘lib, bu kabi pul yig‘ishlarni Nyu-York shahrida ham o‘tkazgan.
Di Kaprio uyida bo‘lib o‘tadigan tadbirdan bir kun oldin Los-Anjelesda Klintonning yana bir uchrashuvi bo‘lib o‘tadi. Unda biznesmen, aktyor, rejissor va prodyuserlar ishtirok etadi. Uchrashuvga kirish chiptasi 2,7 mingdan 100 ming dollargacha narxlanadi.
AQSh prezidentligi uchun saylov shu yilning 8-noyabrida bo‘lib o‘tadi. Hillari Klinton Respublikachilar partiyasi tomonidan nomzod etib saylangan Donald Tramp bilan raqobatlashadi.
Izoh (0)