Toshkentning “Shahriston” metro bekati oldidagi chorrahada 1-avgust, dushanba kuni Mercedes-Benz Conecto Low Floor avtobusi ishtirokida yo‘l-transport hodisasi yuz berdi. Bu haqda Facebook’dagi “Voditeli Tashkenta (Drivers.uz)” guruhida fotoxabar qoldirilgan.
Xabar berishlaricha, chorrahaning qariyb o‘rtasida avtobusning chap tomonidan boshqa bir transport vositasi to‘qnashuv sodir etgan, biroq aynan qanday avtomobil bilan avariya yuz berganiga aniq ma’lumot berilmagan.
Natijada Amir Temur shoh ko‘chasining “Yunusobod” dehqon bozori yo‘nalishi bo‘ylab va Chinobod ko‘chasining Amir Temur shoh ko‘chasi bilan kesishmasida katta tirbandlik yuzaga kelgan.
Xabarga ilova qilingan suratlarda Chinobod ko‘chasidagi tirbandlik oqibatida haydovchilar qarama-qarshi qatnov qismiga tartibsiz ravishda chiqib ketib, yo‘ldagi harakatni butunlay izdan chiqarganini ko‘rish mumkin.
Tez orada hodisa joyida Yo‘l harakati xavfsizligi xizmati xodimlari yetib kelgan. “Militsioner amaki tezda hammasini joy-joyiga tushirdi. Unga layklar bo‘lsin!”, — deb qo‘shimcha qilgan xabar muallifi.
Mazkur fotoxabar ostida fikr bildirgan foydalanuvchilarning aksariyati haydovchilarning bir-birini o‘zaro hurmat qilmasligi, qoidaga xilof ravishda yo‘lning qarama-qarshi qatnov qismiga chiqib, harakatning boshqa ishtirokchilariga xalal berishini keskin tanqid ostiga olgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)