Фото: «Шаҳристон» метро бекати олдидаги чорраҳада юз берган ЙТҲ оқибатида тирбандлик юзага келди

Тошкентнинг «Шаҳристон» метро бекати олдидаги чорраҳада 1 август, душанба куни Mercedes-Benz Conecto Low Floor автобуси иштирокида йўл-транспорт ҳодисаси юз берди. Бу ҳақда Facebook’даги «Водители Ташкента (Drivers.uz)» гуруҳида фотохабар қолдирилган.

Хабар беришларича, чорраҳанинг қарийб ўртасида автобуснинг чап томонидан бошқа бир транспорт воситаси тўқнашув содир этган, бироқ айнан қандай автомобиль билан авария юз берганига аниқ маълумот берилмаган.

Натижада Амир Темур шоҳ кўчасининг «Юнусобод» деҳқон бозори йўналиши бўйлаб ва Чинобод кўчасининг Амир Темур шоҳ кўчаси билан кесишмасида катта тирбандлик юзага келган.

Хабарга илова қилинган суратларда Чинобод кўчасидаги тирбандлик оқибатида ҳайдовчилар қарама-қарши қатнов қисмига тартибсиз равишда чиқиб кетиб, йўлдаги ҳаракатни бутунлай издан чиқарганини кўриш мумкин.

Тез орада ҳодиса жойида Йўл ҳаракати хавфсизлиги хизмати ходимлари етиб келган. «Милиционер амаки тезда ҳаммасини жой-жойига туширди. Унга лайклар бўлсин!», — деб қўшимча қилган хабар муаллифи.

Мазкур фотохабар остида фикр билдирган фойдаланувчиларнинг аксарияти ҳайдовчиларнинг бир-бирини ўзаро ҳурмат қилмаслиги, қоидага хилоф равишда йўлнинг қарама-қарши қатнов қисмига чиқиб, ҳаракатнинг бошқа иштирокчиларига халал беришини кескин танқид остига олган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.