O‘zbekiston 2015-yil yakunlariga ko‘ra, dunyoda aholi soni bo‘yicha 43-o‘rinni egalladi, deya xabar bermoqda UzDaily Jahon banki ma’lumotlariga tayanib.
Jahon banki 2015-yil yakunlariga ko‘ra aholi soni bo‘yicha mamlakatlar reytingini e’lon qildi. Reytingga 217 ta mamlakat kirdi.
Nashr eslatishicha, 2014-yil yakunlari bo‘yicha ham O‘zbekiston ushbu reytingda 43-o‘rinni band etgan edi. O‘shanda O‘zbekiston aholisi soni 30,743 million kishini tashkil qilgan. 2014-yilda O‘zbekiston aholisi 0,557 million kishiga ko‘paygan.
Reytingda Xitoy 1,371 milliard kishilik aholisi bilan birinchi o‘rinda joylashdi. Hindiston (1,311 milliard kishi) va AQSh (321,419 million kishi) mos ravishda ikkinchi va uchinchi o‘rinlarni egalladi.
Eslatib o‘tamiz, O‘zbekistonning doimiy aholisi miqdori 1-iyul holatiga ko‘ra 31,807 million kishini tashkil etdi. Yil boshidan beri o‘sish 231,7 ming kishi yoki 0,7 foizga teng bo‘ldi.
Izoh (0)