Ўзбекистон дунёда аҳоли сони бўйича 43-ўринни сақлаб қолди

Ўзбекистон 2015 йил якунларига кўра, дунёда аҳоли сони бўйича 43-ўринни эгаллади, дея хабар бермоқда UzDaily Жаҳон банки маълумотларига таяниб.

Жаҳон банки 2015 йил якунларига кўра аҳоли сони бўйича мамлакатлар рейтингини эълон қилди. Рейтингга 217 та мамлакат кирди.

Нашр эслатишича, 2014 йил якунлари бўйича ҳам Ўзбекистон ушбу рейтингда 43-ўринни банд этган эди. Ўшанда Ўзбекистон аҳолиси сони 30,743 миллион кишини ташкил қилган. 2014 йилда Ўзбекистон аҳолиси 0,557 миллион кишига кўпайган.

Рейтингда Хитой 1,371 миллиард кишилик аҳолиси билан биринчи ўринда жойлашди. Ҳиндистон (1,311 миллиард киши) ва АҚШ (321,419 миллион киши) мос равишда иккинчи ва учинчи ўринларни эгаллади.

Эслатиб ўтамиз, Ўзбекистоннинг доимий аҳолиси миқдори 1 июль ҳолатига кўра 31,807 миллион кишини ташкил этди. Йил бошидан бери ўсиш 231,7 минг киши ёки 0,7 фоизга тенг бўлди.