2016-yilning 27-iyul kuni Hindistonning Bravo Pharmaceuticals kompaniyasi Toshkent shahridagi Inha universiteti (IUT) bilan tomonlar o‘rtasidagi hamkorlikning asosiy yo‘nalishlarini belgilab beradigan o‘zaro anglashuv to‘g‘risida memorandumni imzoladi. Bu haqda universitet matbuot xizmati xabar bermoqda.
Mazkur hujjatni IUT rektori Sherzod Shermatov va Bravo Pharmaceuticals kompaniyasi bosh direktori Rakesh Pandey imzoladi.
IUT va Bravo Pharmaceuticals kompaniyasi o‘rtasida imzolangan memorandum doirasida, Bravo Pharmaceuticals kompaniyasi IUT’ning iqtidorli talabalarini qo‘llab-quvvatlash maqsadida, ularga grantlar taqdim etadi.
Grantlar dasturi doirasida, Bravo Pharmaceuticals kompaniyasi har yili besh nafar iqtidorli talabalarga to‘rt akademik yil davomida grantlar taqdim etadi. Qayd etamiz, Bravo Pharmaceuticals kompaniyasi vakillari kirish imtihonidagi natijalarga asoslanib, birinchi bosqich talabalari orasidan tanlab olinadi.
IUT va Bravo Pharmaceuticals kompaniyasi sog‘liqni saqlash sohasiga innovatsion yechimlarni tatbiq etish borasida ham hamkorlik qilishni rejalashtirmoqda. IUT talabalari Bravo Pharmaceuticals kompaniyasi ehtiyojlari uchun, shu jumladan, O‘zbekistonda teletibbiyot loyihasi bo‘yicha zarur bo‘lgan turli yechim va mahsulotlarni ishlab chiqishda ishtirok etadi. Mazkur hamkorlik doirasida IUT talabalari real loyiha bilan ishlashdek boy tajriba orttiradi.
Memorandum doirasida Bravo Pharmaceuticals kompaniyasi IUT talabalarini Bravo Exchange dasturi doirasida teletibbiyot va tibbiyot innovatsiyalari sohasida tajriba va bilim orttirish maqsadida xorijdagi korxona va ilmiy-tekshirish markazlariga yuborishga ham tayyor ekanligini bildirdi. Tomonlar, shuningdek, IUT’ning o‘qituvchi-professorlar tarkibi malakasini oshirish dasturini ham tatbiq etib, ularning malakasini oshirish uchun xorijga ham yuborishni rejalashtirishmoqda.
Izoh (0)