Atambayev qirg‘izistonlik sportchilarga Olimpiada o‘yinlaridagi oltin medal uchun 100 ming dollar va’da qildi

Qirg‘iziston prezidenti Almazbek Atambayev Braziliyadagi Yozgi olimpiada o‘yinlarida mamlakat sharafini himoya qilishga tayyorlanayotgan sportchilarni tabrikladi, deb yozadi KNews. Marosim Ala-Archa davlat qarorgohida bo‘lib o‘tdi.

“Qiyinchiliklarga qaramay, biz sportga tobora ko‘proq e’tibor qaratmoqdamiz. Stipendiyalarni oshirdik. Butun mamlakat bo‘ylab sport majmualari qurilmoqda… Siz uchun esa biz yaxshigina mukofotlarni tayyorlamoqdamiz: oltin medal uchun 7 million som (taxminan 104 ming dollar), kumush uchun 5 million som (75 ming dollar) va bronza uchun 3,5 million som (52 ming dollar)”, — deya va’da berdi Atambayev.

Rio-de-Janeyrodagi Olimpiada o‘yinlarida Qirg‘izistondan 19 nafar sportchi ishtirok etadi.