Samvel Babayan: Sizga qiyin — har holda, jurnalistsiz. Biz esa hammasini ko‘rib turamiz

O‘zbekiston va Iroq o‘yinidan keyin o‘zbekistonliklar bosh murabbiyi Samvel Babayan o‘z fikrlarini bildirdi.

“Iroqqa qarshi o‘yinda markaziy himoyada harakat qilgan Azim Ahmedov va Kamoliddin Tojiyev yetarli darajada ishonchli o‘yin ko‘rsatdi. Biroq, qaysidir holatlarda, ayniqsa, o‘yin oxirida hushyorlikni yo‘qotishdi, natijada Iroq ikkita xavfli vaziyat yuzaga keltirdi. Bu barqarorlik yetishmayotganini bildiradi”, — dedi Samvel Babayan.

“Lekin yana bir jihat ham borki, uni alohida qayd etib o‘tish joiz — buni muxlislar ham, jurnalistlar ham bilgandir — Azim Ahmedov ham, Kamoliddin Tojiyev ham bugun maydonga kichik jarohatlar bilan chiqdi. Ammo ularda o‘ynash istagi juda katta edi. Ular yuqori darajada professionallik ko‘rsata olishdi. Bu jarohatlar ham ma’lum ma’noda o‘yinga ta’sir qildi — Ahmedovni shu sabab almashtirdik”, — deb fikr bildirdi Samvel Babayan.

Agar futbolchilarda jarohat bo‘lsa va boz ustiga o‘yin o‘rtoqlik maqomida bo‘lsa, nima sababdan boshqa futbolchilar, masalan, Rustam Ashurmatov yoki Sherzod A’zamov sinab ko‘rilmagani haqidagi savolga Babayan shunday javob berdi:

“Yana bir bor takrorlayman — talabga javob beradiganlargina milliy terma jamoaga chaqiriladi! Bu yerda ko‘pirtirishning hojati yo‘q. Biz bir narsa haqida qayta-qayta gapiryapmiz, o‘sha-o‘sha jurnalistlar savol berishyapti. Biz A’zamovni ham sinab ko‘rganmiz, aytmoqchi, Ashurmatovni ham Iroqqa qarshi birinchi o‘yinda sinab ko‘rdik. Siz u va bu futbolchilar sifati o‘rtasidagi farqni ko‘rmayotgan bo‘lishingiz mumkin, sizga qiyin — har holda, jurnalistsiz, professional nuqtai nazardan esa bizga juda yaxshi ko‘rinadi. Milliy terma talabiga javob berganlargina chaqiriladi, tamom! Bu yerda hech qanday shaxsiy ambitsiyalar, simpatiyalar, antipatiyalar yo‘q. O‘zbekiston fuqarosi hisoblangan har kim milliy terma jamoada o‘ynash imkoniyatiga ega”, — deb fikrini yakundadi Samvel Babayan.

Bundan avvalroq u O‘zbekiston fuqarosi bo‘lgan va Oliy Liga to‘purarlari orasida borayotgan, Osiyo Chempionlar Ligasida ham gol urishda davom etayotgan Temurxo‘ja Abduxoliqovni ba’zi prinsiplarga ko‘ra termaga chaqirmayotganini qayd etib o‘tgandi.