Ўзбекистон ва Ироқ ўйинидан кейин ўзбекистонликлар бош мураббийи Самвел Бабаян ўз фикрларини билдирди.
«Ироққа қарши ўйинда марказий ҳимояда ҳаракат қилган Азим Аҳмедов ва Камолиддин Тожиев етарли даражада ишончли ўйин кўрсатди. Бироқ, қайсидир ҳолатларда, айниқса, ўйин охирида ҳушёрликни йўқотишди, натижада Ироқ иккита хавфли вазият юзага келтирди. Бу барқарорлик етишмаётганини билдиради», — деди Самвел Бабаян.
«Лекин яна бир жиҳат ҳам борки, уни алоҳида қайд этиб ўтиш жоиз — буни мухлислар ҳам, журналистлар ҳам билгандир — Азим Аҳмедов ҳам, Камолиддин Тожиев ҳам бугун майдонга кичик жароҳатлар билан чиқди. Аммо уларда ўйнаш истаги жуда катта эди. Улар юқори даражада профессионаллик кўрсата олишди. Бу жароҳатлар ҳам маълум маънода ўйинга таъсир қилди — Аҳмедовни шу сабаб алмаштирдик», — деб фикр билдирди Самвел Бабаян.
Агар футболчиларда жароҳат бўлса ва боз устига ўйин ўртоқлик мақомида бўлса, нима сабабдан бошқа футболчилар, масалан, Рустам Ашурматов ёки Шерзод Аъзамов синаб кўрилмагани ҳақидаги саволга Бабаян шундай жавоб берди:
«Яна бир бор такрорлайман — талабга жавоб берадиганларгина миллий терма жамоага чақирилади! Бу ерда кўпиртиришнинг ҳожати йўқ. Биз бир нарса ҳақида қайта-қайта гапиряпмиз, ўша-ўша журналистлар савол беришяпти. Биз Аъзамовни ҳам синаб кўрганмиз, айтмоқчи, Ашурматовни ҳам Ироққа қарши биринчи ўйинда синаб кўрдик. Сиз у ва бу футболчилар сифати ўртасидаги фарқни кўрмаётган бўлишингиз мумкин, сизга қийин — ҳар ҳолда, журналистсиз, профессионал нуқтаи назардан эса бизга жуда яхши кўринади. Миллий терма талабига жавоб берганларгина чақирилади, тамом! Бу ерда ҳеч қандай шахсий амбициялар, симпатиялар, антипатиялар йўқ. Ўзбекистон фуқароси ҳисобланган ҳар ким миллий терма жамоада ўйнаш имкониятига эга», — деб фикрини якундади Самвел Бабаян.
Бундан аввалроқ у Ўзбекистон фуқароси бўлган ва Олий Лига тўпурарлари орасида бораётган, Осиё Чемпионлар Лигасида ҳам гол уришда давом этаётган Темурхўжа Абдухолиқовни баъзи принсипларга кўра термага чақирмаётганини қайд этиб ўтганди.
Изоҳ (0)