O‘z tarixida birinchi bor Jahon Chempionatida ishtirok etayotgan O‘zbekiston futzal terma jamoasining guruhdagi raqiblaridan yana biri Portugaliya nafaqat Yevropa qit’asida, balki jahon futzalida ham o‘z obro‘siga ega. Birgina Rikardinyo kabi dunyoga dong‘i ketgan futzalchining o‘ziyoq Portugaliyaning qanday kuchga ega ekanligini ko‘rsatadi.
Portugaliya terma jamoasi 2016-yilgi Yevropa Chempionatini chorak finalda yakunlagandi. Solishtirish uchun qo‘shni Qozog‘iston terma jamoasi Yevropa Chempionatining bronza medallariga ega chiqdi. Biroq bu jamoalar qit’a chempionatida o‘zaro to‘qnash kelmadi.
O‘zbekiston va Qozog‘iston terma jamoalari avgust oyining birinchi o‘n kunligida ikkita o‘rtoqlik o‘yini o‘tkazadi. Bu bellashuvlar O‘zbekiston termasining Yevropa mamlakatlariga qarshi o‘yinlari qanday kechishi borasida dastlabki tasavvurlarni shakllantirishga yordam beradi.
Kolumbiyaga yo‘l
Portugaliya terma jamoasi Yevropa Chempionatini muvaffaqiyatli boshladi va o‘zi joy olgan guruhni 1-o‘rinda yakunladi. Bu yo‘lda jamoa Polshani 6:2 hisobida mag‘lub etdi. Keyinroq esa Norvegiya 6:1, Ruminiya 5:0 hisoblarida dog‘da qoldirildi.
Portugaliya terma jamoasining bu yurishiga serbiyalik futbolchilar chorak finalda yakun yasadi. O‘yin qo‘shimcha daqiqalarga qadar cho‘zildi va unda Serbiya 2:1 hisobida muvaffaqiyat qozondi. Qayd etish kerak, serblar Yevropa Chempionatini 4-o‘rinda tugatgandi.
Chorak finaldagi mag‘lubiyatga qaramay Portugaliya Jahon Chempionati chiptasini qo‘lga kiritib bo‘lgandi. Endi ular O‘zbekiston, Panama va mezbon Kolumbiya bilan bir guruhda ishtirok etish uchun tayyorgarlik ko‘rmoqda.
Kuchli tomonlari
2012-yilgi Jahon Chempionatida Portugaliya terma jamoasi chorak finalga qadar yetib borgandi. Mana endi Yevropa Braziliyasi Xorxe Braz bilan ikkinchi shunday urinishni amalga oshirish uchun bor kuchini safarbar qilishga tayyor.
Jamoaning asosiy yulduzi bo‘lmish Rikardinyo Tailanddagi Jahon Chempionatida Adidas’ning bronza to‘pini qo‘lga kiritgandi. U 2000-yilgi Jahon Chempionatida Portugaliyaning bronza medallarini qo‘lga kiritishiga hissa qo‘shgan va o‘sha mundialdan keyin ham faoliyatini davom ettirib kelayotgan yagona portugaliyalik futbolchi bo‘lib, jamoaning haqiqiy ramziga aylangan.
To‘rt yil avval ko‘pchilikning olqishiga sazovor bo‘lgan uchlik hali ham tarkibda. Kardinal Yevro saralashida 8 ta gol urib, to‘purarlik qobiliyatini namoyish eta oldi. Himoyachilar Pedro Keri va Joao Matos esa har qanday hujumni to‘xtatib qolishga tayyor turibdi. Portugaliyada shuningdek ajoyib darvozabon Vitor Xugo, undan tashqari esa umidli deb qaralayotgan Fabio Sesilio hamda Tiago Brito kabi futzalchilar bor.
Jahon Chempionatlaridagi ishtiroki haqida
Portugaliya futzal bo‘yicha Jahon Chempionatlarining dastlabki uchtasida ishtirok eta olmadi. 2000-yilgi Gvatemala mundialidan boshlab esa birorta ham Jahon Kubogini qo‘yib yubormadi. Gvatemaladagi Jahon Chempionatida faqatgina Braziliya va Ispaniya termalari Portugaliyadan oldinroq turdi, xolos. Gvatemaladagi turnirdan keyin Portugaliya o‘sha muvaffaqiyatni takrorlay olganicha yo‘q. 2004-yil terma jamoaga 5-o‘rin, 2008-yil 9-o‘rin, 2012-yil esa 8-o‘rin nasib qildi.Rikardinyo futbol bilan solishtirganda Krishtianu Ronaldu darajasidagi futbolchi deyilsa, mubolag‘a bo‘lmaydi. Uning mahoratini quyidagi video orqali o‘zingiz ham tomosha qiling.
O‘zbekiston va Portugaliya terma jamoalari o‘rtasidagi bellashuv 16-sentabr kuni 3-tur doirasida bo‘lib o‘tadi.
Izoh (0)