Ўз тарихида биринчи бор Жаҳон Чемпионатида иштирок этаётган Ўзбекистон футзал терма жамоасининг гуруҳдаги рақибларидан яна бири Португалия нафақат Европа қитъасида, балки жаҳон футзалида ҳам ўз обрўсига эга. Биргина Рикардиньо каби дунёга донғи кетган футзалчининг ўзиёқ Португалиянинг қандай кучга эга эканлигини кўрсатади.
Португалия терма жамоаси 2016 йилги Европа Чемпионатини чорак финалда якунлаганди. Солиштириш учун қўшни Қозоғистон терма жамоаси Европа Чемпионатининг бронза медалларига эга чиқди. Бироқ бу жамоалар қитъа чемпионатида ўзаро тўқнаш келмади.
Ўзбекистон ва Қозоғистон терма жамоалари август ойининг биринчи ўн кунлигида иккита ўртоқлик ўйини ўтказади. Бу беллашувлар Ўзбекистон термасининг Европа мамлакатларига қарши ўйинлари қандай кечиши борасида дастлабки тасаввурларни шакллантиришга ёрдам беради.
Колумбияга йўл
Португалия терма жамоаси Европа Чемпионатини муваффақиятли бошлади ва ўзи жой олган гуруҳни 1-ўринда якунлади. Бу йўлда жамоа Польшани 6:2 ҳисобида мағлуб этди. Кейинроқ эса Норвегия 6:1, Руминия 5:0 ҳисобларида доғда қолдирилди.
Португалия терма жамоасининг бу юришига сербиялик футболчилар чорак финалда якун ясади. Ўйин қўшимча дақиқаларга қадар чўзилди ва унда Сербия 2:1 ҳисобида муваффақият қозонди. Қайд этиш керак, серблар Европа Чемпионатини 4-ўринда тугатганди.
Чорак финалдаги мағлубиятга қарамай Португалия Жаҳон Чемпионати чиптасини қўлга киритиб бўлганди. Энди улар Ўзбекистон, Панама ва мезбон Колумбия билан бир гуруҳда иштирок этиш учун тайёргарлик кўрмоқда.
Кучли томонлари
2012 йилги Жаҳон Чемпионатида Португалия терма жамоаси чорак финалга қадар етиб борганди. Мана энди Европа Бразилияси Хорхе Браз билан иккинчи шундай уринишни амалга ошириш учун бор кучини сафарбар қилишга тайёр.
Жамоанинг асосий юлдузи бўлмиш Рикардиньо Таиланддаги Жаҳон Чемпионатида Adidas’нинг бронза тўпини қўлга киритганди. У 2000 йилги Жаҳон Чемпионатида Португалиянинг бронза медалларини қўлга киритишига ҳисса қўшган ва ўша мундиалдан кейин ҳам фаолиятини давом эттириб келаётган ягона португалиялик футболчи бўлиб, жамоанинг ҳақиқий рамзига айланган.
Тўрт йил аввал кўпчиликнинг олқишига сазовор бўлган учлик ҳали ҳам таркибда. Кардинал Евро саралашида 8 та гол уриб, тўпурарлик қобилиятини намойиш эта олди. Ҳимоячилар Педро Кери ва Жоао Матос эса ҳар қандай ҳужумни тўхтатиб қолишга тайёр турибди. Португалияда шунингдек ажойиб дарвозабон Витор Хуго, ундан ташқари эса умидли деб қаралаётган Фабио Сесилио ҳамда Тиаго Брито каби футзалчилар бор.
Жаҳон Чемпионатларидаги иштироки ҳақида
Португалия футзал бўйича Жаҳон Чемпионатларининг дастлабки учтасида иштирок эта олмади. 2000 йилги Гватемала мундиалидан бошлаб эса бирорта ҳам Жаҳон Кубогини қўйиб юбормади. Гватемаладаги Жаҳон Чемпионатида фақатгина Бразилия ва Испания термалари Португалиядан олдинроқ турди, холос. Гватемаладаги турнирдан кейин Португалия ўша муваффақиятни такрорлай олганича йўқ. 2004 йил терма жамоага 5-ўрин, 2008 йил 9-ўрин, 2012 йил эса 8-ўрин насиб қилди.Рикардиньо футбол билан солиштирганда Криштиану Роналду даражасидаги футболчи дейилса, муболаға бўлмайди. Унинг маҳоратини қуйидаги видео орқали ўзингиз ҳам томоша қилинг.
Ўзбекистон ва Португалия терма жамоалари ўртасидаги беллашув 16 сентябрь куни 3-тур доирасида бўлиб ўтади.
Изоҳ (0)