WADA mustaqil komissiyasi Rossiya sport vazirligini doping qo‘llanilishini bevosita nazorat qilishda aybladi

Butunjahon aksildoping agentligi (WADA) rasmiy saytida Richard Maklaren boshchiligidagi mustaqil komissiyaning Rossiyada bo‘lib o‘tgan Sochi Olimpiya o‘yinlarida yo‘l qo‘yilgan doping qallobligi tekshiruvlari yuzasidan xulosalari aks etgan hisoboti chop etildi. Bu haqda “Sport Ekspress” xabar bermoqda.

Hisobotning asosiy xulosalari quyidagilardan iborat:

1. Moskva aksildoping laboratoriyasi doping iste’mol qilgan rossiyalik sportchilarni himoya qilish maqsadida, davlat tomonidan boshqariladigan tizim doirasida harakat qilgan.

2. Sochi aksildoping laboratoriyasi namunalarni almashtirib qo‘yishning o‘ziga xos uslubidan foydalangan, bu bilan doping qo‘llagan rossiyalik sportchilar Olimpiya o‘yinlarida ishtirok etishini ta’minlagan.

3. Rossiya sport vazirligi bu ishlarni nazorat qilgan va bevosita boshqargan, ularga maxsus xizmatlar hamda yuqorida tilga olingan laboratoriyalar yaqindan ko‘mak bergan.

Ayni paytda Kanadaning Toronto shahrida matbuot anjumani bo‘lib o‘tmoqda, unda jurnalistlar hisobot bilan tanishtirilmoqda.