AQSh prezidentlik lavozimiga Respublikachilar partiyasidan nomzodlik qilishini kafolatlagan amerikalik milliarder Donald Tramp saylovchilar orasida ommabopligi bo‘yicha Hillari Klintondan ortda qolishini sezilarli darajada qisqartirdi. Bu haqda The Washington Post gazetasi va ABC telekanali tomonidan o‘tkazilgan umummilliy so‘rovnomaning 17-iyul, yakshanba kuni chop etilgan natijalari guvohlik beradi, deya xabar bermoqda “TASS”.
So‘rovnoma natijasida olingan ma’lumotlarga ko‘ra, noyabr oyidagi saylovlarda Tramp uchun respondentlarning 43 foizi, Klinton uchun 47 foizi ovoz berishga tayyor. So‘rovda qatnashganlarning yana 10 foizi hali kimga ovoz berishini aniqlay olmagan.
Hozir nomzodlar o‘rtasidagi farq 4 foizni tashkil etmoqda. O‘tgan oyda bu ko‘rsatkich 12 foizni tashkil etgan.
Milliarderni qo‘llab ovoz berganlarning 57 foizi sobiq davlat kotibini yoqtirmaganligi uchun unga ovoz bermaganligini ma’lum qilgan. Va aksincha, sobiq birinchi xonim tarafdorlarining 54 foizi u Trampga qarshi chiqayotganligi uchun uni qo‘llab-quvvatlashga tayyor.
Trampni amerikalik erkaklarning 49 foizi qo‘llab-quvvatlashga tayyor bo‘lsa, 41 foizi qarshi ovoz bergan. Klinton uchun esa ayollarning 52 foizi quvvatlab ovoz bergan bo‘lsa, 38 foizi unga qarshi ovoz bergan. Uni, shuningdek, yoshroq avlod vakillari (18 yoshdan 39 yoshgacha) qo‘llamoqda — 54 foiz. Biznesmen uchun pensionerlarning aksariyat qismi ovoz bermoqda (51 foiz).
Izoh (0)