Samvel Babayan murabbiyligidagi O‘zbekiston milliy terma jamoasi Avstriyadagi yig‘ini davomida o‘zining birinchi o‘rtoqlik o‘yinida maydonga tushdi. Buning uchun 6-iyul kuni safarga jo‘nab ketgan jamoaga 12 kun vaqt kerak bo‘ldi.
“Borussiya Dortmund” yoshlariga qarshi o‘yin 1:1 hisobidagi durang bilan yakuniga yetdi, deb xabar berdi “Championat.asia”. O‘zbekiston milliy terma jamoasi safida “Bunyodkor” klubi vakili Eldor Shomurodov kiritilgan golga mualliflik qildi.
“Borussiya Dortmund” klubiga qarshi o‘rtoqlik o‘yini o‘tkazilishi mumkinligi yig‘in oldidan ma’lum bo‘lgan, biroq unda raqibning yoshlar jamoasi ekani ko‘rsatilmagandi. Rejaga ko‘ra 22-iyulga qadar 3 ta o‘rtoqlik o‘yini o‘tkazilishi kerak bo‘lib, hozircha shulardan faqatgina 1 tasi tashkil etildi.
O‘zbekiston milliy terma jamoasi Chexiyaning “Yablonets” klubiga qarshi o‘rtoqlik o‘yinini ham kelishib qo‘ygandi. Biroq kuchli yomg‘ir tufayli uchrashuv bekor qilingan. Bu O‘zbekiston milliy terma jamoasi uchun avval kelishilib, keyin bekor qilingan qatorasiga uchinchi o‘yin edi.
Izoh (0)