Britaniyada olmaxonlar uch yoshli bolaga hujum qildi

Britaniyaning Kornuoll grafligida uch yoshli bolakayni olmaxonlar qattiq tishlab tashladi, deb yozadi TJournal.

Bola onasi bilan birga Kornuoll bog‘ida olmaxonlarni siylayotgan paytida unga kemiruvchilar galasi hujum qilib qoldi.

“Kutilmaganda unga oltita olmaxon tashlanib qoldi. Men bunchalik yurakni ezadigan qichqiriqni hech qachon eshitmagan edim. Hammayoq qon bo‘ldi”, — dedi bolaning onasi. Bolakayni besh joyidan tishlangan holda kasalxonaga yetkazishdi.

Ona-bola bog‘ga doimiy ravishda borib, olmaxonlarga yegulik berardi. Ona o‘rmon kemiruvchilari bola uchun xavf solishini xayoliga ham keltirmaganligini aytdi.

Graflik ma’muriyati hodisa yuzasidan qayg‘u bildirdi, bog‘ rahbariyati esa olmaxonlar odamlarga ko‘nikib qolgan bo‘lishiga qaramay, ular yovvoyi hayvon ekanligini eslatib o‘tdi.