Nitssadagi Ingliz sohiliga 14-iyul oqshomida bayram mushakbozligini tomosha qilish uchun kelgan yosh ayol shu hududda ro‘y bergan terrorchilik harakati vaqtida yaqin oradagi restoranlarning birida farzand tug‘di. Bu haqda “RIA Novosti” agentligi xabar bermoqda.
Chor-atrofda yuz berayotgan voqealardan vahimaga tushish natijasida homiladorlikning to‘qqizinchi oyida bo‘lgan ayolda to‘lg‘oq boshlangan. U sohilbo‘yining boshidagi restoranlardan biriga yashirinishga muvaffaq bo‘lgan.
“Restoran xodimlari uni oshxonaga olib o‘tishgan, ayol shu yaqin atrofda bo‘lgan shifokorning yordami bilan farzandini tuqqan. Shundan so‘ng ona va bolani olib ketgani qutqaruvchilar kelgan”, — deya xabar bermoqda BFMTV telekanali.
14-iyul oqshomida Bastiliya qal’asining olinishi munosabati bilan uyushtirilgan bayram tadbirlari doirasida mushakbozlikni tomosha qilgani Nitssaning Ingliz sohiliga yig‘ilgan olomon ustiga yuk mashinasi bosib borgan. Hujum natijasida 84 kishi halok bo‘lgan, jarohatlanganlarning aksariyati og‘ir ahvolda yotibdi.
Mazkur terrorchilik harakati Nitssada istiqomat qiluvchi, kelib chiqishi tunislik bo‘lgan 31 yoshli Muhammad Buhlel tomonidan amalga oshirilgan. 16-iyul kuni mazkur terakt uchun javobgarlikni IShID terrorchilik guruhi o‘z zimmasiga olgani ma’lum bo‘ldi.IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)