Gretsiya rahbariyati yaqin orada Turkiya rasmiylariga Aleksandrupolis shahriga 8 nafar harbiy to‘ntarish tarafdorlari bilan qo‘ngan vertolyotni qaytarishni rejalashtirmoqda. Bu haqda mamlakat hukumati rasmiy vakili Olga Gerovasili ma’lum qildi, deya xabar beradi “Gazeta.ru”.
Vakilning bildirishicha, Gretsiya hukumati Turkiya bilan imkon qadar tezroq vertolyotni qaytarish masalasini muhokama etgan, shuningdek, to‘ntarish tarafdorlariga nisbatan xalqaro huquq me’yorlari qo‘llanishiga ishonch hosil qilgan. Shuningdek, hibsga olinganlar o‘z mamlakatlarida konstitutsiyaviy qonunchilikni buzishda ayblanayotgani inobatga olingan.
Oldinroq Turkiya tashqi ishlar vaziri Mevlyut Chavusho‘g‘li Gretsiyadan to‘ntarish tarafdorlarini zudlik bilan qaytarishni so‘ragani bildirilgandi.
Eslatib o‘tamiz, 16-iyulga o‘tar kechasi Turkiyada harbiy to‘ntarishni amalga oshirishga urinishda 200 ga yaqin kishi halok bo‘ldi, 2800 dan ortiq harbiy hibsga olindi.
Izoh (0)