Turkiya prezidenti Rajab Toyyib Erdo‘g‘on harbiy to‘ntarishga qarshilik ko‘rsatish uchun ko‘chalarga chiqqan tarafdorlarini tarqalib ketmaslikka chaqirdi. Bu haqda Sky News’ga tayanib, “Interfaks” xabar bermoqda.
Erdo‘g‘onning so‘zlariga ko‘ra, Turkiya hukumatiga qarshi yangi isyon istagan paytda yana tashkillashtirilishi mumkin, shu sababli odamlar ko‘chalarni tark etmasligi kerak.
U yana harbiy isyonchilar uni o‘ldirmoqchi bo‘lganligini aytdi. The New York Times gap Marmaris kurort shahriga tashlangan bomba haqida ketayotgan bo‘lishi mumkinligini qayd etmoqda. “Aftidan, ular meni o‘sha yerda deb o‘ylagan”, — dedi Erdo‘g‘on.
Turkiya OAVlari harbiylarning mag‘lub bo‘lganini ma’lum qilmoqda: askarlar ommaviy ravishda taslim bo‘lmoqda, oddiy fuqarolar esa tashlab ketilgan tanklar va boshqa texnikalarni egallab olmoqda.
Turkiya davlat OAVlari ma’lumotiga ko‘ra harbiy to‘ntarishga urinish oqibatida qurbon bo‘lganlar soni 90 kishiga yetdi, 1,1 ming kishi yaralandi.Shu paytga qadar to‘ntarishga aloqador 1563 kishi hibsga olingani haqida ma’lumot bor. 200 ga yaqin askar va zobit hukumatga taslim bo‘lgani aytilmoqda.
Izoh (0)