Туркия президенти Ражаб Тоййиб Эрдўғон ҳарбий тўнтаришга қаршилик кўрсатиш учун кўчаларга чиққан тарафдорларини тарқалиб кетмасликка чақирди. Бу ҳақда Sky News’га таяниб, «Интерфакс» хабар бермоқда.
Эрдўғоннинг сўзларига кўра, Туркия ҳукуматига қарши янги исён истаган пайтда яна ташкиллаштирилиши мумкин, шу сабабли одамлар кўчаларни тарк этмаслиги керак.
У яна ҳарбий исёнчилар уни ўлдирмоқчи бўлганлигини айтди. The New York Times гап Мармарис курорт шаҳрига ташланган бомба ҳақида кетаётган бўлиши мумкинлигини қайд этмоқда. «Афтидан, улар мени ўша ерда деб ўйлаган», — деди Эрдўғон.
Туркия ОАВлари ҳарбийларнинг мағлуб бўлганини маълум қилмоқда: аскарлар оммавий равишда таслим бўлмоқда, оддий фуқаролар эса ташлаб кетилган танклар ва бошқа техникаларни эгаллаб олмоқда.
Туркия давлат ОАВлари маълумотига кўра ҳарбий тўнтаришга уриниш оқибатида қурбон бўлганлар сони 90 кишига етди, 1,1 минг киши яраланди.Шу пайтга қадар тўнтаришга алоқадор 1563 киши ҳибсга олингани ҳақида маълумот бор. 200 га яқин аскар ва зобит ҳукуматга таслим бўлгани айтилмоқда.
Изоҳ (0)