So‘rovnoma: “Oltin to‘p” uchun kurash davom etadimi yoki uning egasi aniq bo‘lib ulgurdimi?

“Oltin to‘p”ning 2016-yilgi egasi kim bo‘ladi? Bu Yevro—2016 yakunlanganidan keyin eng ko‘p muhokama etilayotgan mavzulardan biri bo‘lib turibdi.

Lionel Messi “Oltin to‘p”lari sonini 5 taga yetkazib olgan. Krishtianu Ronalduda esa bu son uchtani tashkil qiladi. Joriy mavsum portugaliyalik hujumchi ikkita katta muvaffaqiyatni qo‘lga kiritdi: Yevropa Chempionlar Ligasi va Yevropa Chempionati g‘olibligi.

Lionel Messining “Barselona” bilan Ispaniya chempionligi va Kubogini qo‘lga kiritgani, “Real”ning Yevropada yana bir bor tengsiz bo‘lgani bilan raqobatlashishi mumkinmi? Terma jamoalar tasnifida olib qaraganda Messi Argentina bilan Kopa Amerika finalida mag‘lub bo‘ldi, Krishtianu to‘p suradigan Portugaliya esa Yevropa chempionligini nishonladi.

Da’vogarlar ro‘yxatiga Antuan Grizmanni ham kiritish mumkin. Fransiyalik futbolchi ikkita yirik finalda ishtirok etdi: Yevropa Chempionlar Ligasi va Yevropa Chempionati. O‘zi to‘p suradigan “Atletiko” va Fransiya terma jamoasini finalga qadar yetib kelishida qattiq mehnat qildi. Birgina tomoni bor — u har ikki finalda ham Krishtianu Ronaldu to‘p suradigan jamoaga imkoniyatni boy berdi.

2015/16-yilgi mavsum yakunlariga ko‘ra hammadan ko‘proq gol urgan Luis Suaresni ham unutib bo‘lmaydi. U “Bersalona”da Messidan va umumiy raqobatda Ronaldudan sermahsulroq bo‘ldi. Biroq jarohati sabab Urugvay terma jamoasiga Kopa Amerika’da yordam bera olmadi, terma jamoa turnirda muvaffaqiyatsiz ishtirok etdi.

Garet Beyl “Real”ning muvaffaqiyatlariga Ronaldudan kam hissa qo‘shmadi. Yevropa Chempionatiga chiqqanining o‘zi sensatsion voqealik sifatida ko‘rilgan Uelsni Yevro—2016 da yarim finalga qadar boshlab keldi. Mana shu bosqichda u ham Krishtianu Ronaldu to‘p suradigan Portugaliyadan yengildi.

Unutmaslik kerak, oldinda yangi mavsumning yangi yilga qadar davom etadigan birinchi davrasi bor. Yuqorida ko‘rsatilgan beshta futbolchining uni qanday o‘tkazishi ma’lum emas. Sizningcha, oldindagi yarim yillik Ronalduning muvaffaqiyatlari unutilishi uchun yetarli bo‘ladimi yoki Krishtianuning muvaffaqiyatlaridan keyin “Oltin to‘p” egasining nomi aniq bo‘lib qoldimi?

[playbuzz-item playbuzz_url="https://www.playbuzz.com/muhrima10/sizningcha-oltin-to-p-uchun-kurash-davom-etadimi-yoki-uning-egasi-aniq-bo-lib-ulgurdimi"]