Сўровнома: «Олтин тўп» учун кураш давом этадими ёки унинг эгаси аниқ бўлиб улгурдими?

«Олтин тўп»нинг 2016 йилги эгаси ким бўлади? Бу Евро—2016 якунланганидан кейин энг кўп муҳокама этилаётган мавзулардан бири бўлиб турибди.

Лионель Месси «Олтин тўп»лари сонини 5 тага етказиб олган. Криштиану Роналдуда эса бу сон учтани ташкил қилади. Жорий мавсум португалиялик ҳужумчи иккита катта муваффақиятни қўлга киритди: Европа Чемпионлар Лигаси ва Европа Чемпионати ғолиблиги.

Лионель Мессининг «Барселона» билан Испания чемпионлиги ва Кубогини қўлга киритгани, «Реал»нинг Европада яна бир бор тенгсиз бўлгани билан рақобатлашиши мумкинми? Терма жамоалар таснифида олиб қараганда Месси Аргентина билан Копа Америка финалида мағлуб бўлди, Криштиану тўп сурадиган Португалия эса Европа чемпионлигини нишонлади.

Даъвогарлар рўйхатига Антуан Гризманни ҳам киритиш мумкин. Франциялик футболчи иккита йирик финалда иштирок этди: Европа Чемпионлар Лигаси ва Европа Чемпионати. Ўзи тўп сурадиган «Атлетико» ва Франция терма жамоасини финалга қадар етиб келишида қаттиқ меҳнат қилди. Биргина томони бор — у ҳар икки финалда ҳам Криштиану Роналду тўп сурадиган жамоага имкониятни бой берди.

2015/16 йилги мавсум якунларига кўра ҳаммадан кўпроқ гол урган Луис Суаресни ҳам унутиб бўлмайди. У «Берсалона»да Мессидан ва умумий рақобатда Роналдудан сермаҳсулроқ бўлди. Бироқ жароҳати сабаб Уругвай терма жамоасига Копа Америкаъда ёрдам бера олмади, терма жамоа турнирда муваффақиятсиз иштирок этди.

Гарет Бэйл «Реал»нинг муваффақиятларига Роналдудан кам ҳисса қўшмади. Европа Чемпионатига чиққанининг ўзи сенсацион воқеалик сифатида кўрилган Уэльсни Евро—2016 да ярим финалга қадар бошлаб келди. Мана шу босқичда у ҳам Криштиану Роналду тўп сурадиган Португалиядан енгилди.

Унутмаслик керак, олдинда янги мавсумнинг янги йилга қадар давом этадиган биринчи давраси бор. Юқорида кўрсатилган бешта футболчининг уни қандай ўтказиши маълум эмас. Сизнингча, олдиндаги ярим йиллик Роналдунинг муваффақиятлари унутилиши учун етарли бўладими ёки Криштианунинг муваффақиятларидан кейин «Олтин тўп» эгасининг номи аниқ бўлиб қолдими?

[playbuzz-item playbuzz_url="https://www.playbuzz.com/muhrima10/sizningcha-oltin-to-p-uchun-kurash-davom-etadimi-yoki-uning-egasi-aniq-bo-lib-ulgurdimi"]