Xalq deputatlari Toshkent shahar Kengashining o‘n beshinchi sessiyasi bo‘lib o‘tdi. Sessiya ishini xalq deputatlari Toshkent shahar Kengashi raisi, shahar hokimi Rahmonbek Usmonov olib bordi. Bu haqda hokimlik matbuot xizmati xabar bermoqda.
Unda fuqarolar yig‘inlari raislari (oqsoqollari) va ularning maslahatchilari saylovlari yakunlari, yoshlarga oid davlat siyosatini amalga oshirish, kichik biznes, xususiy tadbirkorlikni ishonchli himoya qilish, ish o‘rinlari tashkil etish va aholi bandligini ta’minlash, “Sog‘lom ona va bola yili” davlat dasturining ustuvor vazifalari, 9-sinf bitiruvchilarini akademik litsey va kasb-hunar kollejlariga qamrab olish va shahar Kengashi vakolatiga oid boshqa masalalar atroflicha ko‘rib chiqildi.
Bu yilgi saylovlarda jami 370 nafar mahalla oqsoqollari almashdi. Jumladan, saylangan mahalla raislarining 47 nafarini ayollar tashkil etdi. 505 ta mahalla raislariga maslahatchi etib 7439 nafar fuqaro saylandi. Saylangan maslahatchilarning 1920 nafarini ayollar tashkil etdi.
Sessiyada birinchi marotaba fuqarolar yig‘inlari raislari (oqsoqollari) etib saylanganlar bilan huquqiy bilimlarini oshirish hamda fuqarolar o‘zini o‘zi boshqarish organlarining faoliyat yuritishi bilan bog‘liq amaldagi qonun hujjatlarining qoidalarini o‘rganish, ularning faoliyatini tashkil etish, yoshlarni kasb-hunarga yo‘naltirish, kichik va xususiy tadbirkorlik, oilaviy biznesni rivojlantirish, aholini manzilli ijtimoiy qo‘llab-quvvatlash, jamoatchilik nazorati, tabiatni muhofaza qilish, hududlarni obodonlashtirish va ko‘kalamzorlashtirish, jamiyatda tinchlik va osoyishtalikni ta’minlash masalalari yuzasidan o‘quvlar tashkil etish belgilandi.
“O‘zbekiston Respublikasida yoshlarga oid davlat siyosatining asoslari to‘g‘risida”gi O‘zbekiston Respublikasi Qonuni va Toshkent shahrida joriy yilda yoshlarga oid davlat siyosatini amalga oshirishga qaratilgan hududiy chora-tadbirlar dasturining ijrosi bo‘yicha olib borilayotgan ishlar ko‘rib chiqildi. Tuman hokimliklariga va mutasaddi tashkilot rahbarlariga bir oy muddatda yoshlarning bo‘sh vaqtlarini mazmunli o‘tkazilishini ta’minlash maqsadida “Kamolot” kitob do‘konlari faoliyatini yo‘lga qo‘yish bo‘yicha tegishli taklif kiritish va bu borada ishlar muvofiqlashtirgan holda olib borish tavsiya etildi. Yoshlar bandligini ta’minlash, ularni bunyodkorlik ishlariga jalb qilish maqsadida “Bunyodkor” yoshlar mehnat harakati faoliyatini yanada kengaytirish zarurligi ta’kidlandi.
Izoh (0)